Ish-zv.ministrja e Brendshme, Rovena Voda, kërkon ndryshimin e masës së “arrestit shtëpiak”. Ajo ka ankimuar në Apel këtë masë sigurie me pretendimin se nuk ekzistojnë kushtet ligjore.
Sipas dosjes hetimore: në cilësinë e zv.ministres së Brendshme, Voda ka përfituar 1 mijë euro, një aparat telefonik celular dhe një arkë peshk me qëllim punësimin e Florida Beut.
Takimet mes Vodës, Beut dhe Majlinda Hasanit – kjo e fundit ndërmjetëse – janë realizuar në shkurt-mars 2020 në Ministrinë e Brendshme dhe në Durrës.
Hasani e Beu janë përgjuar në bisedat mes tyre, si edhe familjarëve, kur tregojnë për dhënien e një zarfi me 1 mijë euro Vodës, ku 32-vjeçarja shpreh bindjen se “duan lekë, se pa lekë nuk të bën njeri gjë”.
SPAK ka administruar pamjet e kamerave të sigurisë të një bari në Durrës, ku Voda ka futur në çantën e saj një telefon blerë me herët nga Florida Beu për 550 euro.
Kjo ishte paraprirë nga një bisedë ku Florida saktësonte se zv.ministrja e donte “Samsung” dhe jo “iPhone”.
Ndërsa për marrjen e arkës me peshk, sipas SPAK, Voda ka shkuar në port me automjetin e Ministrisë së Brendshme që mbante si zyrtare e lartë dhe shoferin e saj.
Përballja me kamerat në hyrje, bëri që Voda të dilte nga një derë tjetër nga gjykata. Ajo përdori katin e nëndheshëm, që në përditshmëri përdoret për të pandehurit e prangosur.
