Editori i rrjetit investigativm, BIRN, Besar Likmeta, në një intervistë në “A show” me gazetarin Adi Krastën, foli për përplasjen publike mes kryeministrit Rama dhe kryebashkiakut të Vlorës, Dritan Leli.
Likmeta theksoi se kryeministri po bën gjyq publik si në kohën e komunizmit, duke shtuar se zoti Leli thjesht po u rri besnikë qytetarëve, që e kanë votuar si kryatar bashkie në qytetin bregdetar.
“Sa për problemin e incineratorëve, plehrat në rrugë janë problematikë që dihen. Po harxhojmë miliona euro dhe prapë plehrat janë në rrugë. Mënyra si menaxhohen plehrat është si firmë piramidale. Të harxhosh mbi 100 milionë euro dhe të mbushësh Durrësin me plehra, është pa moral. Për konfliktin mes Ramës dhe Lelit ka ndikuar në mbarëvajtjen e punëve të qytetit. Kur Rama e prezantoi si kandidat, tha se zoti Leli do kishte mbështetjen e tij dhe e kishte, e tani shprehet ndryshe.
Tani që Leli nuk do që të bëhet siç thotë Rama, po sillet me të si në kohën e komunizmit, si me gjyqin e Kadri Hazbiut. Po i bëhet sulm publik kryetarit të bashkisë, me rrënjët që i ka me konfliktin që ka me Ramën dhe deputetët socialistë. Konflikti duket se ishte në faktin se Leli donte të ishte kryetar bashkie dhe jo deputet, siç dëshironte Rama. Zoti Leli nuk ka si të krijojë probleme për qeverinë e Ramës, Leli ka zgjedhur që të mos braktisë qytetarët e të mbarojë mandatin e tij, siç ia kanë dhënë qytetarët”, tha Likmeta.
I pyetur për zgjedhjen në krye të AMA-s të Armela Krasniqit, Likmeta vlerësoi se parlamenti që e zgjodhi atë ishte ilegjitim.
“Autoriteti që mbikëqyr median duhet të jetë i pavarur politikisht. Parlamenti nuk kishte legjitimitet të vendoste Krasniqin në krye të AMA-s. Kjo sepse aty në Kuvend ishin ca njerëz që janë quajtur “opozita parlamentare” sepse duhej një term, por se nuk ishte opozita e vërtetë, e dalë nga vota e shqiptarëve”, u shpreh Likmeta.
