Partizani e mbylli sezonin e shkuar në Superiore me 53 gola të shënuar pas 36 ndeshjesh të luajtura, duke marrë fronin si ekipi me sulmin më të mirë në Shqipëri. Çinari dhe Asani ishin kontribuuesit kryesorë për këtë shifër, me Jasirin që shënoi 9 gola dhe me Eraldon që ishte autor i 8 rrjetave të realizuara.
Pas largimeve të Çinarit dhe Asanit u ngritën shumë pikëpyetje mbi stafin teknik dhe drejtues të Partizanit, pasi nuk po afronin sulmues të rinj. Me golat që ishin larguar dhe me sulmin me pak alternativa, tifozët me të drejtë shfaqën frustrimin e tyre. Por Daja kishte besim te lojtarët që ka në ekip dhe ky besim deri më tani po i jep të drejtë trajnerit kryeqytetas.
Të flasësh për sulmin e Partizanit është e pamundur të mos ia nisësh nga Stenio Zhunior. Bomberi brazilian ka gjetur ambientin e duhur te Partizani dhe po tregon paraqitje të shkëlqyera. Kur stafi teknik i Partizanit i besoi sulmuesit dhe e morën në ekip në muajin janar, Zhunior po vuante te Riga, duke shënuar vetëm dy gola dhe duke dhuruar dy asiste. Por sapo erdhi te Partizani, bomberi brazilian shkëlqeu. 6 gola në Superiore në gjysmën e dytë të sezonit, ndërsa në dy ndeshjet e Ligës së Konferencës, ka shënuar 4 gola dhe ka dhuruar 3 asiste. Një goleador i kuq deri më tani!
CARA – I ri në moshë, por me shumë vetëbesim. 21- vjeçari duket se ka besimin e trajnerit Ilir Daja dhe po bën një punë të shkëlqyer në krahun e djathtë të sulmit. Në sfidën e dytë kundër Sfintulit realizoi një supergol, duke qetësuar nervat e të kuqve pas një starti për t’u harruar në Moldavi. Sezonin e shkuar Cara shënoi 5 gola në Superiore, duke treguar se është një futbollist që premton gola.
LUCAS – Braziliani luajti jashtë pozicionit të tij sezonin e shkuar, duke qenë qendërsulmues. Edhe pse nuk u përshtat më së miri, arriti të shënojë 5 gola në Superiore. Ndërsa këtë sezon duket se ka “rilindur” në krahun e majtë, duke qenë një ndër lojtarët kryesorë në ekip. “Samba” braziliane sapo ka filluar…/Panoramasport
