Prokuroria e Tiranës ka mbyllur hetimet për një 58-vjeçar, i cili akuzohet se përmes mashtrimit tregtonte një medikament me pretendimin se kuronte sëmundjen e koronavirusit.
Nga raportimet mësohet se Frederik Frrokaj, në korrik të 2020, duke shfrytëzuar rrjetet sociale, ka publikuar një video ku reklamonte një medikament të “krijuar” prej tij që shëronte Covid-19.
Për të dokumentar këtë aktivitet kriminal, Prokuroria ka infiltruar dy agjentë të policisë dhe pasi kanë lënë takim me të kanë blerë “medikamentin” kundrejt shumës prej 20 mijë lekësh.
Më pas janë janë realizuar analizat dhe ka rezultuar medikament i rremë me përbërje të të cilit 80 % e sasisë është kripa.
Për këtë prokuroria ka mbyllur hetimet dhe ka dorëzuar dosjen për gjykim me akuzën e mashtrimit ndaj Frederik Frrokaj.
Frederik Frrokaj u ndalua rreth 1 vit më parë nga Policia e Kurbinit, bashkë me nipin e tij, ndërsa ky i fundit u akuzua se po i shiste ilaçin një klienti në një lokal. Në atë kohë u raportua se Frederik Frrokajt në banesë iu gjetën edhe pesë pajisje mjekësore pa faturë tatimore, të cilat dyshohet se mund t’i ketë futur kontrabandë.
Sipas njoftimit të policisë në korrik të 2020, materialet do t’i kalojnë Prokurorisë pranë Gjykatës së Shkallës së Parë Kurbin, për veprat penale “Mashtrimi”, “Prodhimi i kundërligjshëm i artikujve dhe mallrave industrialë e ushqimorë”, “Fshehja e të ardhurave” dhe “Tregtimi dhe transportimi i mallrave që janë kontrabandë”.
