Disa vite më parë, emri i Federiko Zenunit qarkullonte vazhdimisht në FSHF, pasi asokohe djaloshi i talentuar vlerësohej si një nga emrat që do të shkruanin historinë me fanellën kuqezi. Mesfushori ofensiv, në fillimet e karrierës së tij ishte pjesë e përfaqësueses U15 të Italisë dhe kur vendosi të zgjidhte më pas fanellën kuqezi, u prit krahëhapur në FSHF.
Ai ishte fillimisht pjesë e rëndësishme e përfaqësueses U17 të Shqipërisë e më pas asaj U19, ku edhe mbajti shiritin e kapitenit e shënoi dy gola në një ndeshje zyrtare ndaj Uellsit. Por pas një titulli kampion me të rinjtë e Torinos, karriera e tij nuk shkoi ashtu siç shpresonte mes profesionistëve dhe ai nuk ka arritur që të bëjë hapin e madh në karrierë ende, duke luajtur me skuadra të ndryshme vetëm në Serinë C.
Sot, Zenuni ka firmosur për skuadrën e radhës në këtë kategori, duke iu bashkuar Potencës, të zyrtarizuar nga vetë klubi me një foto të tij me presidentin e klubit, pasi ka nënshkruar për një vit. Kjo është një tjetër mundësi për 24-vjeçarin që të tentojë ëndrrën e madhe të ngjitjes në seritë më të larta të futbollit italian, ku synonte të ishte protagonist kur ai vlerësohej si një nga yjet e të ardhmes të akademisë së Torinos e gjithashtu edhe futbollit shqiptar.
