Jemin Gjana, kryetari i Komisionit Zgjedhor në PD, u shpreh mbrëmjen e sotme, se në votimin për zgjedhjet e anëtarëve të Këshillit Kombëtar të PD, kanë marrë pjesë 5300 delegatë me të drejtë vote. Sipas Gjanës në garë janë 598 kandidatë, për 300 vendet e Këshillit, ndërsa sqaroi se 45 do të jenë nga FRPD dhe rreth 100 do të jenë zonja dhe zonjusha.
Sipas tij, pjesa tjetër janë kandidatët që kanë emrin në listën e votuar nga delegatët e Kuvendit Kombëtar.
Gjana tha se procesi i numërimit mund të zgjasë deri në orët e para të së dielës, pasi është një proces kompleks.
“Besoj se pas mesnatës mund të kemi një rezultat mbi emrat e anëtarëve të rinj të Këshillit Kombëtar”, tha Gjana.
