Kuvendi Kombëtar i Partisë Demokratike, ka mbyllur punimet pas 7 orë punimesh, ndërsa janë miratuar ndryshimet statutore të propozuara nga kreu demokrat, Lulzim Basha.
Gjithashtu 7 mijë delegatë nga i gjithë vendi, kanë votuar për zgjedhjen e anëtarëve të rinj të Këshillit Kombëtar, duke pasur të drejtën e zgjedhjes së 35 emrave në një listë me rreth 600 të tillë. Pritet që rezultati të shpallet ditën e nesërme, pas numërimit të votave që do të tregojnë më pas se kush janë 300 anëtarët e rinj të cilët do të përbëjnë Këshillin Kombëtar të PD-së. Referuar statutit, anëtarët e Kryesisë, deputetët, si dhe ish-Kryeministrat, ish-Kryetarët e PD, ish-Presidentët dhe ish-Kryeparlamentarët e kësaj force politike, janë automatikisht anëtarë të Këshillit.
Kuvendi Kombëtar gjithashtu miratoi analizën e zgjedhjeve të 25 prillit, ku theksi u vu në atë që u konsiderua si masakra zgjedhore nga Qeveria.
Një nga momentet e veçanta të punimeve të Kuvendit Kombëtar ishte fjalimi i Mark Markut, deputetit të Lezhës, i cili ndryshe nga fjalimet e mbajtura në këtë Kuvend, tha se nëse vazhdohet me këtë strategji atëherë do të rrezikojnë të humbin përsëri në zgjedhjet e ardhshme.
Ndërsa Bujar Leskaj mori përsipër përgjegjësinë e humbjes në zgjedhjet e 25 prillit, për sa i përket qarkut të Vlorës.
