Një i ri i shpallur në kërkim për tentativë vrasje dhe armëmbajtje pa leje është arrestuar pas mesnate te “Shkëmbi i Kavajës”.
Në pranga u vu Aleksandër Mehmetaj, banues në Durrës.
Aksioni nga policia e qytetit bregdetar dhe forcat “Shqiponja” për arrestimin e tij erdhi pas informacioneve të marra në rrugë operative, konfirmoi policia.
Ndaj Mehmetajt, janë caktuar 2 urdhër-arreste për 2 ngjarje të ndodhura më parë:
- Për veprat penale “Vrasja me dashje e mbetur në tentativë” dhe “Armëmbajtja pa leje”, pasi më datë 02.07.2018, në Durrës, ka plagosur me armë zjarri shtetasin B. G;
- Për veprat penale “Vrasja me paramendim” e mbetur në tentativë dhe “Armëmbajtja pa leje”, pasi më datë 20.09.2020, në Tiranë, ka plagosur me armë zjarri shtetasin S.B.
- Gjithashtu, për këtë shtetas ishte caktuar dhe urdhër-ndalimi, pasi ishte në kërkim për veprat penale “Drejtim mjeti në mënyrë të parregullt” dhe “Mosbindja nga urdhrit të punonjësit të Policisë”.
Gjatë kontrollit fizik ndaj të riut, shërbimet e Policisë kanë gjetur dhe sekuestruar në cilësinë e provës materiale një armë zjarri, 5 fishekë dhe 4 aparate celulare.
