Presidenti Ilir Meta ka kërkuar nga institucionet shtetërore të zbardhin me transparencë dhe të hedhin dritë mbi të vërtetën e eshtrave të zbuluara sot në truallin e ish-repartit ushtarak në Përmet, që dyshohet se i përkasin viktimave të diktaturës.
“U njoha për zbulimin në Përmet, sipas të dhënave paraprake, të një varri masiv, ku dyshohet se prehen viktima të represionit dhe terrorit të diktaturës. I nxis institucionet përgjegjëse shtetërore për zbardhjen me transparencë dhe ndriçimin e së vërtetës”, shkruan Meta në rrjetin social.
Në vijim, Presidenti thekson se të ekzekutuarit padrejtësisht dhe martirët e pafajshëm meritojnë një vendprehje dinjitoze, respektin e plotë dhe nderimin e duhur shtetëror.
“Theksoj me forcë domosdoshmërinë, jo vetëm të dënimit të krimeve monstruoze të diktaturës, por edhe gjendjen e të gjitha viktimave të atij regjimi mizor, në mënyrë që shpirtrat e tyre të pushojnë në paqe duke u dhënë njëherë e mirë qetësi dhe ngushëllim familjarëve e pasardhësve të tyre, por edhe të gjithë shoqërisë”, shprehet Presidenti.
