Sfintul-Partizani/ “Demat” duhet të kenë kujdes! Sfidën e gjykon greku Fotias, i rreptë me kartonët

Skuadra e Partizanit do të zhvillojë sot takimin e kthimit ndaj Sfintulit, i vlefshëm për turin e parë të Ligës së Konferencës. Në “Elbasan Arena”, të kuqtë kanë triumfuar ndaj ekipit moldav me rezultatin e thellë 5-2.

Përballja e dytë mes dy ekipeve, do të gjykohet nga greku Vasilis Fotias, i asistuar nga Çrisoula Kourompilia dhe Andreas Meintanas, ndërsa arbitër i katërt do të jetë Agelos Evangelou. Për ta njohur disi më mirë kryesorin Fotias, duhet t’u referohemi statistikave. Fotias është një arbitër i ri në moshë, vetëm 32 vjeç, por ka arbitruar plot 62 ndeshje në total.

LEXO EDHE  VIDEO/ Kundërsulm spektakolar, Kastrioti befason Kukësin në “Elbasan Arena”

Në këto 62 takime, është treguar shumë i rreptë dhe ka akorduar plot 306 kartonë të verdhë, si dhe 8 kartonë të kuq. Po ashtu, kryesori grek ka akorduar edhe 18 penallti, duke treguar se nuk ka aspak frikë të jetë protagonist në episode delikate.

“Demat” e Ilir Dajës duhet të tregohen të kujdesshëm me ndërhyrjet e tyre, sidomos brenda 16 metrave, pasi penalltitë mund të jenë një faktor që do të ndikojnë për keq. Gjithashtu, duhet të kenë kujdes edhe nga ndëshkimet me kartonë, pasi arbitri grek nuk “fal”.