Ëndrrat e shqiptarit u thyen në mes, kur ra në prangat e policisë. 19-vjeçari Drilon Zelaj kujdesej për 213 bimë narkotike në një ‘shtëpi bari’, ndërsa u kap nga policia. Mediat britanike shkruajnë se i riu e kishte mbjellë drogën në gjashtë dhoma në një shtëpi të madhe me katër kate në Bradford.
Zelaj fillimisht nuk ua hapi derën efektivëve të policisë, por ato u futën nga dera e prapme, pasi dëgjonin lëvizjet e 19-vjeçarit brenda godinës dhe më pas bënë arrestimin e tij. Ai fillimisht mohoi se ishte përfshirë në prodhimin e bimëve të kanabisit dhe tha se nuk e kishte ndërtuar ai ‘shtëpinë e barit’, dhe se roli i tij ishte të ujiste bimët dhe të ndizte e fikte dritat.
Prokurori Ken Green tha se Zelaj, një shtetas shqiptar, nuk kishte dënime të mëparshme në Mbretërinë e Bashkuar. 19-vjeçari tha para gjykatës se ai kishte mbërritur në Angli nga Franca për një jetë më të mirë dhe me shpresën për t’i dërguar para familjes së tij të varfër në Shqipëri. Zelaj fillimisht kishte punuar në një lavazh makinash përpara se të merrej me kultivimin e bimëve narkotike.
