Nga Boldnews.al
Një skemë tipike kriminale është zbatuar me plehrat e Kavajës. Plehra të lëna ngado. Sulme ndaj landfillit egzitues, duke e lançuar publikisht se s’ka asnjë parametër mjedisor. Më pas, detyrimi i Bashkisë së Kavajës të lidhë një marrëveshje me landfillin e Tiranës. Por, pavarësisht se marrëveshja është pa afat kohor, landfilli këmbëngul që Bashkia e Kavajës, apo Këshilli Bashkiak të miratojnë një marrëveshje 27 vjeçare që këto plehra të dërgohen në këtë incenerator.
Mungesa e një vendimmarrje të tillë, i ka kthyer palët në pikën 0, ku landfilli i Sharrës ka mbyllur traun për mjetet që shkojnë nga Kavaja. Dhe, ata që po e vuajnë janë mijëra pushues që janë ende në bregdetin e Kavajës, apo edhe operatorët turistikë, të cilët janë penalizuar mjaftueshëm nga kjo situatë. Boldnews ka siguruar dokumentin e firmosur nga Bashkia e Kavajës dhe përfaqësuesit e Landfillit. Dokument që i jep të drejtë bashkisë. Por, landfilli nuk po e zbaton, duke vënë në trysni bashkinë të lidhë me ta një marrëveshje afatgjatë.
Boldnews ka bërë një vëzhgim në rrugët e Golemit për plehrat. Ditët e fundit, pas trysnisë së madhe të operatorëve turistikë, firma e pastrimit Alko Impex, ka bërë heqjen e një pjese të plehrave. Mjetet e saj kanë shkuar deri në afërsi të landfillit dhe nuk kanë mundur dot që të futen brenda tij. Ndërkohë, mjete të tjera, qendrojnë në hyrje të Golemit. Ato vetëm sa qendrojnë në këtë vend, pasi e kanë të pamundur që të marrin plehrat dhe t’i dërgojnë në Sharrë. Një situatë surreale, ku Bashkia e Kavajës duket se ka “ngritur duart lart”. Askush nuk guxon që të firmosë marrëveshjen që t’i çojë në Sharrë për 27 vjet. As Këshilli Bashkiak, që është një organ kolegjial. As Redjan Krajli, i vendosur nga socialistët. Por, presioni duket se vjen nga qendra.
Boldnews ka siguruar një dokument, e cila është një marrëveshje mes Bashkisë së Kavajës dhe Landfillit të Sharrës që plehrat e rrethit të Kavajës të dërgohen në këtë vend. Është një akt marrëveshje, e cila ka disa kushte. Në pikën e parë ngarkohet Bashkia e Kavajës që të depozitojë në Sharrë mbetjet, duke njoftuar me e-mail koncesionarin 24 orë më parë. Në nenin 2 janë edhe deryrimet e Bashkisë së Kavajës.
Sipas asaj që shkruhet në marrëveshje, Bashkia e Kavajës ka disa kushte të rënda. Ajo duhet të marrë përsipër që të bëjë transportin e mbetjeve nga Kavaja në Sharrë, Tiranë. Një kosto e shtuar e Bashkisë së Kavajës dhe e banorëve të saj. Gjithashtu, është vendosur si kusht që, nëse mjetet i hedhin plehrat në vende të tjera jashtë landfillit, atëherë ndërpritet menjëherë kjo marrëveshje. Më tej sqarohet se koncesionari mund të vendosë ndërprerjen e kalimit të mjeteve në këtë landfill. Dhe, nëse ndërpritet marrëveshja, koncesionari nuk mban asnjë përgjegjësi.
Në nenin 3, të dokumenteve që disponon Boldnews, është edhe afati. “Palët bien dakort që kjo akt-marrëveshje lidhet për një afat të pacaktuar”, thuhet në këtë dokument. Pra është e shkruar tepër qartë se s’ka afat. Por, Boldnews ka mësuar se koncesionari ka ndryshuar rregullat gjatë lojës, duke tentuar që këtë afat ta bëjë 27 vjeçar.
Në nenin 4 janë edhe çmimet. Sipas dokumentit, “palët bien dakort që Bashkia Kavajë t’i paguajë Integrated Energy BV SPV 29 euro për ton, pa TVSH”. Madje, kjo faturë duhet të paguhet brenda 10 ditëve. “Në rast të mospagesës, koncesionarit i lind e drejta e moslejimit të mjeteve në landfill” thuhet në këtë dokument. Ndërkohë, ka edhe specifikime për mbetjet, pasi nëse janë mbetje të tjera, atëherë kostoja rritet.
Në fund, këtë akt-marrëveshje e ka firmosur kryetari i Bashkisë Kavajë, Redjan Krajli dhe Administratorja e Koncesionarit, Arjola Kodra. Por, sipas Krajlit, kjo marrëveshje është ndërprerë në mënyrë të njëanshme nga koncesionari, duke mbytur në plehra vijën bregdetare të Kavajës, por edhe vetë qytetin dhe Njësitë Administrative.
