DETAJE – Kokaina e sekuestruar në Durrës/ Zbulohen 14 pako, vinte nga Ekuadori (VIDEO)

Katërmbëdhjetë pako me kokainë janë sekuestruar në një kontejner me banane në Portin e Durrësit këtë të Martë, konfirmoi policia.

Burime zyrtare bënë me dije se dy persona janë shoqëruar në Drejtorinë Vendore të Policisë Durrës pas zbulimit të kokainës nga Task Forca permanente e përbashkët e përbërë nga Policia Kufitare e Portit të Durrësit, Policia Kriminale e DVP Durrës dhe autoritetet doganore të Portit.

Peronat e shoqëruar janë shoferi që do të tërhiqte ngarkesën dhe administratori i firmës që kishte porositur kontejnerin me banane ku u gjet droga.

Ndërkaq, burime pranë grupit hetimor bëjnë me dije se kontejneri kishte dy ditë që kishte mbërritur në port dhe autoritetet kanë pasur informacion se brenda tij mund të kishte drogë. Autoritetet kanë pritur të vinte shoferi për të tërhequr ngarkesën dhe në këto momente kanë ndërhyrë duke zbuluar dhe sasinë e drogës që dyshohet të jetë rreth 150 kg kokainë. Megjithatë pritet peshimi për të zbuluar sasinë e saktë.

LEXO EDHE  Detajet/ Zjarr i madh në një fabrikë në periferi të Tiranës

Kontenjeri u fut në anije në Ekuador më 26 Maj, ndërsa u nis tre ditë më vonë nga shteti latin, më 29 Maj. Më tej, ngarkesa ndaloi në Marok më 16 qershor, në Greqi në 29 qershor, për të zbarkuar më pas në Portin e Durrësit.

Kjo është e disata herë gjatë viteve të fundit, që në Portin e Durrësit sekuestrohet kokainë me prejardhje nga Amerika Latine, të fshehura në kontejner me banane.

Lexo edhe:

Kokaina në Durrës, ja cila është firma porositëse