Partia Demokratike, përmes deputetit Belind Këlliçi, ka denoncuar sot favorizimin e kompanisë së Agim Kajmakut, ish-kryebashkiakut të Vorës, i shkarkuar nga ligji i dekriminalizimit, në fitimin e tenderave me fondet publike.
Këlliçi tha se kompania AME 2020 shpk, në pronësi të Agim kajmakut, ka fituar tendera nga Bashkia e Fierit dhe OSHEE.
“AME 2020 sh.p.k., në pronësi të Kajmakut, ka përfituar 2 tendera. Një nga nga OSHEE sh.a me objekt “Mirëmbajtje e ambienteve të brendshme dhe taracës për OSHEE Group sh.a dhe për Drejtorinë Rajonale Tiranë / OSSH sh.a”, me vlerë 61,136 euro. Oferta më e lartë!
Dhe një tjetër nga Bashkia Fier me objekt “Blerje lule dekorative”, me vlerë 16,279 euro. Edhe ky tender me ofertën më të lartë!”, tha Këlliçi.
Ai u shpreh se modeli i korrupsionit me tenderat, është modeli i ndërtuar nga Edi Rama. Sipas tij, ky model duhet ndëshkuar dhe kjo është e vetmja rrugë që Shqipëria të çlirohet nga korrupsioni dhe t’u kthehet sa më parë shqiptarëve.
“Ky pra është Edi Rama i vërtetë. Ai që para kamerave qan për taksat e qytetarëve, dhe pas kamerave i përdorë ato për të shpërblyer ata me të cilët ka kryer masakrën zgjedhore të 25 prillit.
Korrupsioni dhe bashkëpunimi me krimin janë modeli me të cilin Edi Rama ka shkaktuar rrënimin e përditshëm të ekonomisë së çdo familje, duke nxitur largimin masiv e të rinjve shqiptarë”, tha Këlliçi.
