Prokuroria malazeze heton vjedhjen e cigareve në portin e Tivarit

Vjedhja e raportuar e 1,160 kutive me cigare me vlerë gjysmë milioni euro nga porti kryesor i vendit ka ardhur si një tjetër kujtesë se Mali i Zi ka ende një problem me kontrabandën e duhanit.

Zyra e Prokurorit të Shtetit të Malit të Zi të hënën kërkoi miratimin nga Gjykata Themelore të një urdhri për kontrollimin e të gjithë hangarët në portin e Tivarit pas vjedhjes së 1,182 kutive duhan nga porti.

Më 10 korrik, Zyra e Prokurorit nisi një hetim për bastisjen e një hangari në port dhe vjedhjen e një numri të madh cigaresh “Marble” me vlerë 500,000 euro.

“Prokuroria kërkoi një urdhër për realizmin e një inventari të të gjithë mallrave që ndodhen në hangar. Ne gjithashtu i kërkuam gjykatës që të kontrollojë magazinat e tjera brenda portit të Tivarit”, tha Radovan Djurisiç, nga Zyra e Prokurorisë në Tivar, për gazetën e përditshme Vijesti.

Më 10 korrik, TV Vijesti raportoi se persona të panjohur hynë në hangarin e kompanive Aurora dhe Atlant Mont dhe vodhën 1,160 kuti cigare me vlerë 500,000 euro.

Mediat njoftuan se hangarët janë në pronësi të Dragan Vujaciç i cili u gjykua para Gjykatës së Lartë për kontrabandë cigaresh në 2005, por u lirua nga akuzat në 2013.

Sipas mediave, cigaret e vjedhura u transportuan nga porti me kamion, ndërsa Zyra e Prokurorit tha se do të monitorojë videot e mbikëqyrjes nga kamerat e sigurisë për të gjetur autorin/ët.

Menaxhmenti i portit më 10 korrik u kërkoi autoriteteve të hetojnë çështjen, duke pretenduar se shërbimi i tyre i brendshëm i sigurisë monitoron automjetet e ngarkesave që largohen nga zona e portit, por se ata nuk kanë “kompetencë për të verifikuar vlefshmërinë e dokumentacionit për ngarkesën që transportojnë”.

LEXO EDHE  U shpenzuan 78.6 mln euro për 6 helikopterë, ku kanë përfunduar (VIDEO)

Një nga udhëheqësit e partisë në pushtet, Fronti Demokratik, Nebojsa Medojeviç, tha se autoritetet duhet ta hetojnë çështjen sa më shpejt të jetë e mundur.

“Si është e mundur që të vidhen mallra nga një depo doganore kur ajo ishte e mbyllur me dy kyça? Dikush vodhi pothuajse një ton cigare dhe autoritetet pretendojnë se nuk e dinë kush e bëri atë”, postoi ai në Twitter.

Që nga shpërbërja e Jugosllavisë në vitet 1990, Tivari ka qenë një qendër e njohur për kontrabandën e cigareve.

Policia në vitin 2019 sekuestroi 1.7 milion paketa cigaresh me vlerë rreth 3.9 milionë euro. Në gusht 2018, policia arrestoi 10 zyrtarë doganorë nga porti për kontrabandë cigaresh, po kjo nuk u shoqërua me ndonjë dënim.

Në maj të vitit 2019, një investigim i BIRN tregoi se Mali i Zi ishte kthyer përsëri në qendrën e një mashtrimi global të kontrabandës së duhanit, duke futur në BE miliona cigare të falsifikuara përmes përdorimit të anijeve “fantazmë” dhe duke përdorur dokumente të rreme.

Më 2 korrik, qeveria njoftoi fillimin e një procesi ligjor për të ndaluar magazinimin e cigareve në portin e Tivarit si pjesë e masave për të parandaluar kontrabandën e duhanit dhe cigareve, për të cilat vendi ka një reputacion shumë të keq.

Në progres raportin e Malit të Zi për vitin 2020, Komisioni Evropian paralajmëroi se numri i ndjekjeve penale të filluara për këtë çështje ishte i pamjaftueshëm, duke marrë parasysh shkallën e vlerësuar të kontrabandës së duhanit në të gjithë vendin. /BIRN/