Një grua 90-vjeçare belge, e cila vdiq pasi u sëmur me Covid-19, ishte infektuar me të dy variantet Alpha dhe Beta të koronavirusit në të njëjtën kohë, thanë studiuesit.
Gruaja e pavaksinuar u shtrua në spitalin OLV në qytetin Aalst pas një fluksi infektimesh dhe doli pozitive për Covid-19 të njëjtën ditë.
Ndërsa nivelet e saj të oksigjenit fillimisht ishin të mira, gjendja e saj u përkeqësua shpejt dhe vdiq pesë ditë më vonë. Pastaj, u zbulua se ajo ishte e infektuar si me llojin Alpha, ashtu edhe me variantin Beta.
“Të dyja këto variante qarkullonin në Belgjikë në atë kohë, kështu që ka të ngjarë që zonja të ishte bashkë-infektuar me viruse të ndryshme nga dy njerëz të ndryshëm”, tha biologia molekulare Anne Vankeerberghen nga spitali OLV që drejtoi kërkimin.
“Për fat të keq ne nuk e dimë se si ajo u infektua”, shtoi Vankeerberghen teksa tha se ishte e vështirë të thuhej nëse bashkë-infeksioni luajti një rol në përkeqësimin e shpejtë të pacientes.
Kërkimi, i cili nuk është dorëzuar ende në një revistë mjekësore për botim, po paraqitet në një kongres evropian mbi mikrobiologjinë dhe sëmundjet infektive.
Ndërsa Vankeerberghen tha se nuk kishte “asnjë rast tjetër të botuar” të bashkë-infeksioneve të ngjashme, ajo shtoi se “fenomeni ndoshta nënvlerësohet”.
Kjo ishte për shkak të testimit të kufizuar për variante shqetësuese, tha ajo, duke bërë thirrje për një rritje në përdorimin e testimit të shpejtë PCR për të zbuluar variante të njohura.
