Nga Boldnews.al
Arrestimet me shumë zhurmë, të kryera nga Prokuroria Speciale (SPAK) gjatë kësaj jave, fillimisht me ndalimin e disa zyrtarëve në Lushnje e më tej në Ministrinë e Brendshme, nën akuzën për “shkeljen e barazisë në tendera”, shoqërohen me një pyetje që ende nuk ka asnjë përgjigje: “Përse të arrestuarit duhet të shkelnin ligjin?”.
Shumëkush mendon që abuzimet me procedura tenderuese janë kryer për qëllime korruptive, pra për përfitime personale të zyrtarëve që dyshohet se i kanë kryer shkeljet ligjore.
Por, si në rastin e arrestimeve në Lushnje, ashtu edhe në ato të fundjavës në Ministrinë e Brendshme, SPAK-u nuk ka ngritur dyshime për veprën penale të “Korrupsionit”.
Akuza që u është atribuuar zyrtarëve të prangosur është “shkelja e barazisë në tendera”, një vepër penale që është në kufijtë mes kundravajtjes dhe krimit e që dënohet me burgim nga 5 ditë deri në 3 vjet maksimalisht.
Në mungesë të një përgjigje racionale nga SPAK se përsa këta zyrtarë të arrestuar janë detyruar të shkelin ligjin, më poshtë është renditja e disa arsyeve, nga më të pabesueshmet e deri tek më logjiket.
Nuk duan të qëndrojnë në shtëpi? Një arsye, megjithëse aspak logjike, është që zyrtarët që kanë shkelur ligjin, nuk duan të qëndrojnë në shtëpi në këto ditë të nxehta dhe shpresojnë të gjejnë freski në qelitë e paraburgimit.
Duan të provojnë efikasitetin e SPAK-ut? Këta zyrtarë mund të jenë aventurierë dhe kanë tentuar të provojnë nëse Prokuroria Speciale Kundër Korrupsionit është aq e aftë sa të zbulojë shkeljet e tyre.
Kanë ndihmuar korrupsionin e shefave të tyre? Kushdo mendon që kjo mund të jetë arsyeja më logjike. Zyrtarët e niveleve të ulta janë detyruar, nën kërcënimin e vendit të punës, që të nënshkruajnë dokumenta në favor të kompanive të caktuara dhe, duke ndihmuar shefat e tyre që të sigurojnë para të lehta nëpërmjet korrupsionit.
Natyrisht, ky është edhe qëllimi i krijimit të SPAK. Madje, që në emërtimin e kësaj strukturë- Struktura e Posaçme Kundër Korrupsionit (dhe Krimit të Organizuar) është parashikuar që ajo të luftojë korrupsionin.
Por, në rastet e fundit, përtej masivitetit të të arrestuarve dhe zhurmës mediatike, shoqëruar me duartrokitjet virtuale të partnerëve ndërkombëtarë, SPAK nuk ka arritur të sigurojë prova dhe as të formulojë akuza për korrupsion.
Rasti i tenderit 25 milionë euro për veshjet e punonjësve të Policisë dhe Gardës së Republikës mund të ishte një ndër aksionet e mirëpritur në luftën kundër korrupsionit.
Vlera e tenderit ishte gjigande dhe akuzat në kallëzimin penal për këtë rast përfshinin edhe ish-Ministrin e Brendshëm, Sandër Lleshaj e ish-Sekretarin e Përgjithshëm, Plarent Ndreca.
Por, siç u konstatua mëngjesin e kësaj të Shtune, hetimet e SPAK-ut u konkluduan me arrestimin e disa zyrtarëve të nivelit bazë, të cilët, me shumë mundësi, as në ëndrrat e tyre më të bukura, nuk e kanë menduar se do të siguronin të ardhura korrupsioni në vlera miliona euro.
