Nga BoldNews.al
Arrestimi i kryebashkiakut të Lushnjes Fatos Tushe dhe i disa zyrtarëve të tjerë lokal u trumbetua nga daullet e Rilindjes si bujë e madhe. Një kryebashkiak në pranga dhe kjo në pamje të parë duket se nuk është pak, por për SPAK, është fare pak, sepse nga ky institucion i ri i drejtësisë pritet shumë dhe me të drejtë, ndonëse ka afër dy vjet nga ngritja nuk ka dërguar qoftë edhe një dosje domethënëse për abuzim nga zyrtarët e lartë shtetëror.
Imazhi ka rëndësi dhe për të rregulluar institucionin që më shumë flet sesa vepron, tërhoqën një fije që këputet më lehtë. Tushja i Lushnjes është i arrestuar, duke mbetur pas kjo tymnajë që është një tentativë për të mbuluar apatinë e SPAK. Në këtë rast po “i bien samarit që ta dëgjojë gomari”, por “Gomari i Rilindjes” ecën i qetë, ngarkuar kapic me paranë e pisët dhe korrupsionit. Madje e quan veten “kalë rrace” tani që rrëmbeu mandatin e tretë.
Sa “larg” shkoi SPAK, duke gërmuar një dosje për pastrimin e një kanali vaditës për një shumë prej 24 milionë lekëve të reja?! Padyshim që çdo abuzim i çdo qindarke të taksave qytetare është krim, por krimi krimit nuk i ngjan.
Pak metra larg gdinës së SPAK ka një vendkrimi të hapur. Është çështja e prishjes së Teatrit Kombëtar. Dosjen ia kanë çuar prej muajsh, por askush nuk lëviz nga “elita” e drejtësisë së re. Kush mund të goxojë të prekë Veliajn pa izmin e Ramës?
Gjithashtu një tjetër dosje për akuzën e pastrimit të parave dhe jo të “kanaleve muzeqare” ka mbërritur nga Italia. Mafiozët në vendin fqinj flasin për pastrim parash në kullat e Tiranës. Përmendin edhe një drejtor të madh policie, kryebashkiakun e Tiranës dhe një biznesmen ndërmjetës që kishte lidhje me pushtetarët.
Kullat po ngrihen frikshëm duke i bërë hije edhe prokurorëve të SPAK që paguhen dhe ruhen mirë. Nuk dihet burimi i të ardhurave të ndërtuesve. Ndërsa për shuma abuzimesh sa tenderi i kanalit vaditës të Lushnjes, Bashkia Tiranë i shpenzon për t’i pirë ujë me bidon…
Prokurorët e SPAK kanë edhe status të veçantë, por edhe pse po mbushin dy vjet nga krijimi i institucionit nuk kanë dërguar një çështje të vetme për akuzën e korrupsionit të zyrtarëve të lartë publik. Tosi i Lushnjes thonë se e kishte bërë disi “baltë myzeqeje” mënyrën sesi ushtronte funksionin e tij. Një vit më parë në zyrë iu hodh një granatë nga ish-shoferi personal duke e lënë atë të plagosur lëhtë bashkë me sekretaren.
Nëse hetuesit e SPAK shkuan deri në Lushnje për të kapur “peshkun e madh” duket se u ka shkuar rruga komplet dëm dhe lajmi i bujshëm do të ikë si një limonatë vere. As mburrjet abasadoreske dhe “kërcënimet” se të gjithë janë të barabartë para ligjit nuk do vlejnë. Fatkeqësisht shenjat janë dhënë se SPAK është kushtëzuar të lundrojë në ujëra të qetë, aty buzë kanaleve vaditës, apo të hetojë mbi analizat e urinës së kryebashkiakëve socialistë nëse kanë pirë ose jo kokainë. Kaq, jo më shumë!
