Nga Boldnews.al
Shqiptarët u paguajnë deputetëve rrogën e majme. Dietat që shkojnë sa rroga. Karburantin, telefonin, strehimin. Madje, edhe kujdesin shëndetësor. Dhe, sikur të mos mjaftonin të gjitha këto, ne, taksapaguesit, do të paguajmë edhe për higjienën e tyre personale.
Të jenë të paraqitshëm, të larë, të krehur. Madje, të pispillosur. Do t’u paguajmë edhe mbrojtjen nga Covidi. Dhe, kur të dalin në pension, do të kenë pension sa rroga aktuale e deputetit. Kurse ne, taksapaguesit, do të mbledhim qindarkat që do të lënë këta. BoldNews ka siguruar dokumentet e një tenderi që ka zhvilluar Kuvendi i Shqipërisë. Do të shpenzohen plot 30 mijë euro për materiale për higjienën e tyre personale. Madje, materiale pastrimi dhe aromatizues për makinat si dhe për letrat higjienike…
Në dokumentet e siguruara nga BoldNews, mësohet se është bërë procedura e prokurimit me objekt “blerje materiale të ndryshme pastrimi dhe materiale COVID 19, sipas sasive të kërkuara”. Në dokumentet shoqëruese thuhet se këto materiale të jenë të gatshme për 20 ditë, me qëllim që të jenë gati për baballarët e rinj të kombit që do të futen në shtator.
Kuvendi kërkon që të gjitha materialet të jenë të certifikuara dhe me logo EU. Kërkojnë materiale dezifektant me bazë alkooli për mbushjen e shisheve në ambientet e Kuvendit apo edhe xhel për duart. Ndërkohë, bashkëlidhur gjenden edhe të dhënat për materialet, ku kërkohet që solucioni për pllakat të jetë profesional dhe të lërë aromë të lehtë pas larjes. “Të jetë prodhim me standarte të EU dhe i certifikiar sipas standarteve”, thuhet në këto dokumente.
Krerët e Kuvendit janë kujdesur në detaje për të gjitha materialet e pastrimit. Ata janë kujdesur edhe për prapanicat e deputetëve, duke vendosur disa specifikime edhe për letrën higjienike. “Letër higjienike në jo më pak se 10 rula. Letra të ketë ngjyrë të bardhë. Duhet që produktet e brendit të kenë certifikatë kualiteti ku të përshkruhet që materiali është i padëmshëm për shëndetin e njeriut”, thuhet në këto specifikime. Ndoshta, letrat e mëparshme nuk kanë qenë cilësore, dhe pas “ankesave” të mundshme, janë kërkuar letra të padëmshme. Dhe, me këto “të mira”, shpresojmë që legjislatura e re të prodhojë sa më shumë ligje për ne, taksapaguesit, qe iu paguajmë deputetëve edhe letrat për prapanicat.
