Tregtari që shiti bombolën e gazit, rrjedhja e së cilës soli edhe shpërthimin me plagosjen e katër anëtrëve të së njëjtës familje, u vu në pranga.
Policia njoftoi këtë të Mërkurë se ai ushtronte pa licencë aktivitetin tregtar të shitjes së gazit.
“Nga strukturat e Seksionit për Hetimin e Krimit Ekonomiko-Financiar u bë arrestimi në flagrancë i shtetasit: Petrit Mlloja, 46 vjeç, banues në Shkodër, për veprat penale ‘Fshehja e të ardhurave’, ‘Ushtrimi pa licencë i aktivitetit tregtar’, ‘Shkelja e rregullave mbi lëndët djegëse’ dhe ‘Tregtimi dhe hedhja për konsum e lëndëve djegëse, në kundërshtim me ligjin’”, njoftoi policia.
“Në vijim të veprimeve hetimore për ngjarjen e ndodhur më datë 04.07.2021, në fshatin Pulaj Plazh, Velipojë, Shkodër, në një hotel trekatësh, ku si pasojë e shpërthimit të një bombole gazi mbetën të dëmtuar shtetasit A. Gj. 40 vjeçe, D. Gj. 19 vjeçe, K. Gj. 15 vjeçe dhe E. Gj. 12 vjeç, u konstatua se gazi që përdorej në këtë hotel tregtohej në kundërshtim me ligjin nga shtetasi P. M., të cilit një ditë pas ngjarjes iu bllokua aktiviteti nga ISHTI. Shtetasi P. M. e ka shkelur masën e bllokimit të aktivitetit duke vazhduar tregtimin pa licencë të gazit të lëngshëm dhe të naftës, jashtë kushteve tekniko-ligjore”, shtuan të njëjtat burime.
Inspektorati Shtetëror Teknik dhe Industrial njoftoi më herët se “nisur nga kontrolli i objektit në fjalë dhe deklarimet e PMNZSH Shkodër, shpërthimi dhe zjarri dyshohet të ketë ndodhur nga rrjedhja e gazit G L N nga një nga bombolat e kampingut e cila mund të jetë lënë e hapur gjatë natës si pasojë e një gabimi njerëzor. Sasia e gazit të rrjedhur dhe hermeticiteti i ambientit ka krijuar kushte për shpërthim dhe zjarr në prezencë të faktorëve të jashtëm, si ndezja e dritave në këtë ambient ose përdorimi i burimeve të tjera të zjarrit nga pakujdesi njerëzore”.
