Nga Boldnews.al
Parlamenti i legjislaturës 2017-2021 sot mbylli dyert. Shumë prej tyre nuk do të jenë më deputetë dhe kemi të drejtë që “qajmë” me ngashërim për këta ligjvënës që do të ikin. Njerëz të “ditur” dhe me integritet të madh. Ngritën duart përpjetë në votimin e çdo ligji oligarkie që vintet në emrin e qeverisë. I dhanë Ramës frymë edhe atëherë kur ishte gati për “koma politike”. Po ata ishin të zgjuar dhe këtë e bënë për të mirën e vendit, jo për interesat e tyre personale.
Duhet nisur nga kryet. Do mungojë Gramoz Ruçi që dha dorëheqjen, edhe pse ishte fitues në listat e deputetëve. 31 vite në politikë dhe do ndihet shumë mungesa e buzëqeshjes së tij. Ish-sekretari i Parë i Rrethit Tepelenë, komunist në letra dhe shpirt nuk do jetë më. Kujë e madhe, qani qytetarë, për këtë personazh kaq “qytetar”.
Oh sa do na mungojë edhe “Baba Taku” me atë çantën e tij të zezë, që e kishte që nga koha kur shërbente si prokuror dhe gjyqtar i diktaturës. Nuk do kemi më një politikan me qëndrime “parimore”, një herë me PS e një herë me LSI, kush t’i ofronte post e karrige deputeti. Ai do ikë dhe kjo mbetet humbje e madhe edhe për brezat e rinj të cilët kishin një “model” si Taku.
Nuk do kemi më as deputetët e vetëshpallur opozitarë. Nuk do kemi më as “koperatën” e famshme, as ata që hynë si demokratë dhe dolën si Rilindas, as Murrizin me pikpamjet e tij oksidentale për shkak të shkollimit “anglo sakson”. Do mungojë edhe Gjuzi që e niste me temën e ditës dhe kalonte tek prejardhja si Pellazg. Nuk do jetë as Selamiu që bëri çmos që nipat dhe mbesat tona “pensionistë” të kishin më shumë të drejta.
Po nuk do jetë më deputet as dy të rinjtë Fatmir Velaj dhe Alket Hysenaj. Ata ngjyrat në veshjen e Velajt, që kombinonte deri rripat e këpucëve me jakën e këmishës, ndiznin “zili” edhe femrat deputete për nga kombinimet si muret e dikurshme të bojatisjes së Ramës nëpër qytet. Ai vërtetë nuk mbajti ndopnjë fjalim, qëndrim dhe të ishte aktiv në komisionet parlamentare, por diti mirë të binte në sy për shkak të rrobave që herë herë dukej sikur ia kishte marrë borxh kllounëve.
Po Keti i Jugut, ky “pasha” i kohëve moderne që tjetërsoi thuajse gjithë vijën brendetare? Sa keq, nuk do jetë më. Do mungojë zëri i tij në mbrojtje të Ramës për çdo gjë, edhe kur nuk kishte rob në tokë ti dilte në krah pas ndonjë skandali.
Vendit i iku një Parlament që ndoshta kurrë nuk do i vijë më, duke u krahasuar me njohurite dhe idealet atdhetare të viteve 20, kur në Kuvend ishte Noli, Fishta, Mjeda, Gurakuqi etj. Me keta dijetarë dhe atdhetarë disa prej tyre e krahasuan veten. Qani se nuk do jenë më!
