Gramoz Ruçi, i cili deklaroi tërheqjen nga politika më 12 qershor, është tërhequr edhe nga nisma që ndalonte gazetarët që të ndiqnin mbledhjet e Komisioneve Parlamentare, apo të ndiqnin seancat parlamentare.
Protestat e nisura një muaj më parë, për të mos lejuar izolimin e medias në Parlamentin shqiptar duket se dha rezultat.
Reporterët do të mund të ndjekin fizikisht në Kuvend, mbledhjet e komisioneve parlamentare, teksa pamjet e prodhuara nga Kuvendi nuk do të jenë të vetmet që media do të mund të transmetojë.
Kreu i Kuvendit, Gramoz Ruçi, ka firmosur mbi vendimin e Byrosë së Kuvendit e cila rrëzoi vendimarrjen e saj të mëparshme, duke pranuar kërkesa të gazetarëve. Gjithashtu Kuvendi u tërhoq nga vendimi që punonjësit e gardës së republikës të shoqërojnë gazetarët në ambjentet e Kuvendit, duke konsideruar si të nevojshëm vetëm kontrollin fillestar kur ata hyjnë në institucuion.
Reagimet e forta të reportetëve të terrenit erdhën menjëherë pas vendimit të Byrosë së Kuvendit, e cila i linte gazetarët jashtë institucioneve, duke urdhëruar që aksesi i vetëm që ata kishin të ishte përmes një salle në Kuvend ku të transmetoheshin në kohë reale mbledhjet e Komisionet.
Pas protestave të gazetarëve dhe reagimeve të shoqatave të gazetarëve dhe Bashkimit Europian, duket se Rilindja u tërhoq nga nisma fillestare.