Italia është finalistja e parë e Kampionatit Europian, pasi mundi në gjysmëfinale Spanjën pas penalltive.
Italianët e nisën ndeshjen mirë, por presioni i tyre zgjat vetëm pak minuta. Kontrollin e fushës e marrin më pas spanjollët duke bërë lojën e tyre. Shumë shpejt iberikët kanë dhe kërcënim e parë në portën e të kaltërve. Mikel Oyarzabal shërbehet në mënyrë të shkëlqyer në zonë por sulmuesi i Real Sociedad nuk e merr si duhet topin.
Iberikët shfrytëzojnë tërheqjen e Italisë për të dalë në lojën e tyre por janë të pasaktë përpara portës. Dani Olmo ka një tjetër mundësi të mirë në minutën e 25-të por Donnarumma i mohon golin. Goditja e parë në portë e “axurrëve” vjen vetëm në minutën e 52 nga Chiesa.
Megjithatë vetëm pak çaste më vonë, sulmuesi i Juventus është ai që kthehet edhe njëherë në hero për Italinë, kur realizon një tjetër gol spektakolar duke i dhënë avantazhin Italisë. Spanja nuk heq dorë nga përpjekjet për të shënuar, por shpërdoron në mënyrë të pabesueshme edhe kur ishte shumë pranë, sërish me sulmuesin Oyarzabal.
Megjithatë, për barazimin mendon Morata, i cili lë pas dy shokët e tij të Juventusit, Chiellini e Bonucci dhe mposht edhe Donnarumma-n. Koha e rregullt u mbyll në barazim 1-1, ndërsa edhe 30 minutat e shtesës nuk dhuruan gol dhe gjithçka u vendos te penalltitë, ku italianët u treguan më të saktë.
