Dritan Demiraj, ish-ministri i Brendshëm teknik në 2017, përmes një postimi në rrjetet sociale, ka reaguar lidhur me dëshminë e dhënë nga një prej të penduarve të operacionit “Shpirti”, sipas të cilit radarët fikeshin kundrejt pagesave 15 mijë euro nga trafikantët.
Demiraj shkruan se 4 vite më parë në detyrën si Ministër i Brendshëm ka denoncuar me fakte veprimtarinë korruptive dhe kriminale në lidhje me mosfunksionimin e qendrës së radarëve dhe bashkëpunimin e trafikantëve me Ministrinë e Mbrojtjes në kohën e Mimi Kodhelit dhe të Arjan Krajës.
Demiraj thekson se Kodheli me gjithëse kishte dijeni për fikjen e radarëve, nuk merrte asnjë masë.
“Këtë e vërteton më së miri edhe deklarimi i dëshmitarit të drejtësisë se personeli i radarëve paguhej me 15.000 Euro kur fiknin radarët.
Kjo është vërtetuar edhe me parë nga përgjimet e klanit Habilaj, duke vërtetuar më së miri se akuza e ime dhe e Drejtorit të Përgjithshëm të Policise ndaj Kodhelit ështe e vërtetë”, shkruan Demiraj.
Sipas tij, tani për ish-ministren e Mbrojtjes fjalën e ka SPAK-u.
“Kjo histori fillon në muajin tetor 2013 me tenderin e mirëmbajtjes së radarëve, moskryerjen e shërbimeve në to, firmosjen e tenderave korruptivë nga komandantet e Forcave Detare (nën drejtimin Sekretarit të Përgjithshëm të Ministrisë së Mbrojtjes ) gjë që çoi në ngritjen e autostradës së drogës në Adriatik në vitet mars 2015-maj 2017”, shkruan Demiraj.
