Nga BoldNews.al
Një nga aferat më të kushtueshme për buxhetin e shtetit është ndërtimi i inceneratorëve dhe kostoja për depozitimin e plehrave. Kosto të cilën po e vuan Elbasani, Tirana dhe aktualisht edhe Fieri. Në momentin e dhënies së koncesioneve, këto bashki morën premtimet se do të rregullohej infrastruktura apo do të punësoheshin qindra banorë të zonës. Jo vetëm që s’po ndërtohet asnjë infrastrukturë, por edhe ato që janë ekzistuese po shkatërrohen. Madje, po “importohen” edhe punëtorë nga qytete të tjera.
Bashkitë kanë marrë “urdhër” që të ndihmojnë me çfarë të munden këto inceneratorë, pronarët e së cilave kanë lidhje të forta me politikanë qendrorë, madje me kupolën e shtetit. Dhe, të tillë “urdhër” duket se do të ketë marrë edhe Armando Subashi, kreu i Bashkisë Fier.
Sipas dokumenteve qe disponon BoldNews, Subashi ka hapur një tender me objekt “rikonstruksion i segmentit të rrugës hyrja Kallm – Incenerator dhe segmenti Kryqëzimi – Qendër Kallm”. Segmente që kalojnë, apo janë “private” të koncesionarit të inceneratorit. Vonesat në afate të kësaj vepre shumë të debatuar, jo vetëm për banorët vendas të Kallmit dhe Verrisë, duket se po kompensohen nga ndihma e Subashit. Vlera e këtij tenderi është 20.397.004 lekë, ose mbi 200 mijë euro me TVSH. Një “ndihmë” e madhe në këtë situatë, ku koncesionarit duket se i kishin mbaruar paratë.
Por, nëse edhe këto vepra po bëhen me paratë publike, përse do e menaxhojë privati? Përse do të përfitojë për vite më radhë fitimet? A nuk parashikohej në kontratë që rrugët hyrëse dhe dalëse të bëheshin nga koncesionari? Çfarë përftimi ka Subashi nga ky incenerator? Subashi duhet të përgjigjet për këto dhe dhjetëra pyetje të tjera, pasi informacionet tregojnë se ai ka lidhje të ngushta me koncesionarin apo me firmat nënkontraktore.
Duke shfletuar dokumentet mësojmë se kohëzgjatja e kontratës është vetëm 28 ditë, çka ngre të tjera, dyshime se po bëhet me shpejtësi, pasi koncesionari ka shkelur të gjitha afatet kohore të vënies në punë. Fillimisht duhet të dorëzohej në dhjetor, por është shtyrë pambarimisht, duke sjellë një situatë kaotike me plehrat në Fier.
Megjithatë, në dokumentet e këtij tenderi ka edhe specifikime se çfarë do të behet. Dhe, rezulton se janë pikërisht rrugët lidhëse dhe në afërsi të kësaj vepre që po ndërton Subashi. Po, nëse Tushe i Lushnjes u arrestua për një tender kanali, përse Subashi ka dorë të lirë në koncesione apo ndihmon këto firma? A mos ndoshta mes Subashit dhe Tushes ka pasur konflikt për mbetjet? A janë kërkuar mbetjet e Lushnjes të dërgohen në këtë incenerator?
Duket se “mafia e plehrave” ka marrë kontrollin e gjithçkaje, duke vendosur kryetarë bashkish apo duke arrestuar dhe proceduar të tjerë. Kryetarët e paprekshëm duket se janë ata me inceneratorë, Erion Veliaj, Gledian Llatja i Elbasanit apo edhe Armando Subashit. Ndërkohë, në listë mund të futet edhe kryetarja e komanduar e Durrësit, Emirjana Sako, që gjithmonë po këmbëngul që plehrat e qytetit të saj të shkojnë në Tiranë. Të tjerët?! Të gjithë te paralajmëruar…
