Deputeti demokrat, Enkelejd Alibeaj, ka reaguar përmes një postimi në rrjetet sociiale, lidhur me dëshminë e publikuar nga një prej të penduarve të drejtësisë, i cili zbuloi të gjithë rrjetin e trafikut të drogës nga Shqipëria drejt Italisë.
Dëshmia e dhënë nga i penduari çoi në arrestimin e të paktën 38 personave në kuadër të operacionit “Sjpirti” i drejtuar nga anti-mafia italiane dhe që u shtri në 4 shtete: Spanjë, Itali, Shqipëri dhe Malin e Zi.
Alibeaj i referohet pikërisht momentit lidhur me fikjen e radarëve, një akuzë kjo që është hedhur vite më parë nga opozita në drejtim të Qeverisë Rama dhe që konfirmohet sot nga dëshmia e të penduarit të drejtësisë.
“Kur radarët e një shteti anëtar të NATO-s fiken në shërbim të trafikut të drogës, do të thotë se shteti është vendosur në shërbim të krimit! Ja si mashtruan ministrat e Ramës”, shkruan Alibeaj, ndërsa poston videon e mëposhtme, ku shfaqen Sajmir Tahiri, Mimi Kodheli dhe Olta Xhaçka, që në periudha të ndryshme, mohojnë fikjen e radarëve.
