Vendimi i fundit i Gjykatës Kushtetuese, që e konsideroi si në kundërshtim me ligjin themeltar të shtetit kalimin e truallit të Teatrit Kombëtar në pronësi të bashkisë, duke ngritur shumë pikpyetje edhe për mënyrën e prishjes së tij, ka futur edhe njëherë në konflikt aktivistët e “Aleanca për Teatrin” me Erion Veliajn.
Lëvizja qytetare ka depozituar një tjetër kallëzim në SPAK kundër kryebashkiakut. Aty theksohet se, ndonëse KLSH kishte paralajmëruar se prishja nuk duhet të ndodhte pa një vendim gjykate, ndonëse presidenti i Republikës, bëri kallëzim në kushtetuese kundër vendimit të Këshillit Bashkik për shembjen e godinës, fadromat e Erion Veliajt nuk u ndalën në furinë e tyre të rrënimit.
Duke u nisur nga vendimi i Gjykatës Kushtetuese që bën nul vendimin e Këshillit Bashkiak për shembjen e godinës së vjetër, Aleanca ka kërkuar sekuestro preventive të truallit si dhe çuarjen para gjykatës së të pandehurve për këtë çështje.
“Kemi kërkuar arrestimin e kryebashkiakut Erion Veliaj pasi ka mundësi potenciale për fshehjen, falsifikimin dhe manipulimin e provave. Pozicioni në krye të bashkisë i mundëson atij manipulimin e provave dhe ushtrimin e presionit ndaj vartësve për falsifikimin e dokumentave. i kemi kërkuar SPAK mbylljen e hetimeve për të gjitha çështjet dhe të çohen të gjiothë kallëzuarit përpra gjykatës”, tha sot para godinës së SPAK ku depozitoi kallëzimin avokatja e protestuesve, Adriana Kalaja.
Por, nga Budapesti ku ndodhet për një vizitë zyrtare Eron Veliaj ka folur për një nga ekranet e tij të preferuara Report TV. Kryebashkiaku që manipulon ditën për diell, duke e përshkruar vendimin e Kushtetueses si krejtësisht në favor të tij (ndonëse thelbi është se bashkia nuk ka më asnjë punë me truallin e teatrit që i kthehet si pronë qeverisë) Veliaj deklaroi se ai do të vazhdojë me ngritjen e godinës së re. Por e veçanta pas kërkesës për arrestimin e tij nga aktivistët e mbrojtjes së teatrit është se kryebashkiak i humbi argumentat dhe e prishi gjuhën. Në intervistën për Report TV Këtu poshtë), ai i quajti ata budallej që hedhin gurë në lumë dhe hajvanë. “Njerëz që nuk janë artistë, që janë dënuar për mashtrim, që nuk kanë pronësi, marrin attribute të kota. Ne i bëjmë personazhe publikë që më pas do të harronin. E njëjta gjë ndodhi edhe me ata që protestuan tek lodrat të liqenit apo tek unaza. Këta janë njerëz kot, që hedhin gurë në lumë, dhe nuk besoj që ne të zgjuarit duhet të ikim të nxjerrim gurin nga lumi. Nuk mund t’i përgjigjemi çdo hajvani që merr mikrofon”, tha Veliaj.
Duket qartë se pas vendimit të Kushtetueses kryebashkiak e ka humbur qetësinë duke servirur sharje në vend të argumentave. Ndonëse ai nuk ndihet aspk i rrezikuar tani për tani me një SPAK të kontrolluar nga Rilindja, vendimi i Kushtetueses e hodhi poshtë gjithë propagandën e bërë për një kohë të gjatë për ngritjen e teatrit duke i dhënë si kompensim kullat e larta në qendër të Tiranës kompanisë Fusha.
