Në kuadër të Samitit të Berlinit, kryeministri Edi Rama ishte pjes, e konferencës online me homologët nga Ballkani Perëndimor, ku i është drejtuar kancelares gjermane Angela Merkel, me falënderimet se ajo po mban gjallë procesin, si edhe akuzoi Bashkimin Europian, duke thënë se po shuan flakën e shpresës tek e ardhmja.
“Pikë së pari do të doja të të falënderoja shumë sinqerisht për nisjen dhe mbështetjen gjatë tërë kësaj kohe të këtij procesi, e për angazhimin tuaj të fortë e të palëkundur për rajonin tonë. E di që nuk të pëlqejnë lëvdatat, por faktikisht mendoj që procesi që nisët ka qenë vërtetë shumë i rëndësishëm për të mbajtur gjallë atë që, meqë ra fjala, BE-ja po e shuan, flakën e shpresës tek e ardhmja.
Mendoj se është shumë e rëndësishme që ne të kemi më shumë autorësi në proces, aq sa është e rëndësishme po kështu që procesi të kombinohet me përpjekjet e shtuara të Komisionit, mbështetur në planin e ri ekonomik dhe të investimeve. Është e trishtë dhe të gjithë e dinë që ndërkohë procesi i Integrimit Europian të të gjithë rajonit në BE, që dikur shihej dhe tregohej si rruga e duhur për të nënshtruar nacionalizmat ballkanikë, është shndërruar tanimë në një proces që shtypet nga nacionalizmat e BE-së. Ja që, herë aty e herë këtu, nacionalizmat në BE po e ndërlikojnë shumë rrugëtimin tonë europian e po luajnë shumë rolin e kundërt me të. Megjithatë, siç thoshte edhe legjendari Donald Trump, “Është kjo që është”, kësisoj na duhet të ecim përpara me atë çka kemi”, u shpreh Rama.
Kancelarja Angela Merkel mbajti këtë të hënë nëpërmjet një videokonference, seancën e fundit të procesit të Berlinit, me gjashtë kryeministrat e vendeve të Ballkanit Perëndimor. Në samitin e fundit, përveç 6 liderëve ballkanas morën pjesë dhe disa nga liderët e vendeve të Bashkimit Europian dhe jo vetëm, mes tyre Emmanuel Macron, Mario Draghi, Sebastian Kurtz, si dhe kryeministri i Britanisë së Madhe Boris Johnson. Në fjalën e saj në fund të samitit, Angela Merkel përshëndeti procesin e Berlinit, duke theksuar të gjitha arritjet në 7 vite takime, që prej krijimit të nismës në 2014.
