Aktori Edmond Budina ka zbuluar në emisionin ”Kjo Javë” të Nisida Tufës në Neës24 arsyet pse Aleanca për Tetarin dyshon se Soreca mund të ketë ndikuar tek Gjykata Kushtetuese në disfavor të tyre.
Aleanca për Mbrotjen e Teatrit kërkon që Soreca të shpallet ‘non grata’ teksa Budina e cilëson ambasadorin e BE një diversant që e ka sabotuar kauzën e tyre.
“Zoti Soreca për mendimin tim në çështjen e Teatrit Kombëtar është një diversant që ka sabotuar çështjen e Teatrit Kombëtar dhe këtë e them me bindje të plotë. Ne kemi bërë disa takime me të dhe ai nuk ka reaguar fare, shkon në gjykatën kushtetuese fshehurazi, ditën që do gjykohej cështja e Teatrit Kombëtar. Pse nuk e bëri publike siç i ka bërë të gjitha të tjerat? Pse nuk u shpreh z.Soreca edhe pas takimit, dhe pasi e zbuluam ne. Të thoshte: I kërkoj Gjykatës Kushtetuese të jetë e paanshme. Këtë duhet të bënte z.Soreca dhe jo të na akuzonte për shpifje, le të na akuzojë, ka për ta parë që të ato shpifje do të dalin të vërteta fjalët tona.
Sepse aty padiskutim që është diskutuar për cështjen e Teatrit Kombëtar, dhe ne do të kërkojmë edhe prokurorë, hetues ndërkombëtarë që ta verifikojnë, ta zbulojnë sepse nuk ka asnjë protokoll për atë c’ka është biseduar atje. Nuk ka asnjë gjë publike, pastaj në fund të fundit, përse shkon ai në Gjykatën Kushtetuese. Kryetarja e Gjykatës kushtetuese nuk ka tagër për reformën në drejtësi, as nuk cakton se kush do të jenë dy vakancat e lira. Përse shkon ai ditën që gjykohet cështja e Teatrit kombëtar.”- tha Budina ndërsa komentoi edhe vendimin e Këshillit të ministrave, për t’i siguruar mbrojtje ambasadorit të BE përmes gardës së republikës.
