Të tjera detaje janë bërë publike në lidhje me operacionin ndërkombëtar të drogës, të zhvilluar në Shqipëri, Itali, Mal të Zi dhe Spanjë, ku u godit një rrjeti i trafikut të drogës nga Shqipëria në Itali.
Nga hetuesit shqiptarë dhe ata italiane behet e ditur se është zbuluar një rrjet i drogës në të gjithë hallkat e zinxhirit të tij. Hetimet janë thelluar më tej edhe në pastrimin e parave.
Janë pesë punonjës policie dhe 1 prokuror mes personave të arrestuar nga operacioni ndërkombëtar kundër një grupi kriminal, të dyshuar për korrupsion, shpërdorim detyre, pastrim parash e trafik ndërkombëtar të sasive të konsiderueshme të lëndëve narkotike.
Maksim Sota, prokuror në Vlorë, Festim Lelaj, ish-oficer policie në Vlorë, Ilir Balla – shef i sektorit të trafiqeve në Drejtorinë e përgjithshme të Policisë, Saimir Kurti, drejtori i Zyrës së Punës në Kavajë janë disa nga zyrtarët e ish-zyrtarët e vënë në pranga në kuadër të këtij operacioni.
Në total janë lëshuar 38 urdhër-arreste, 10 prej të cilëve ekzekutuar dhe të akuzuarit janë arrestuar më parë e ndodhen në Itali.
Ndërkohë, edhe personat e arrestuar në Mal të Zi dhe në Spanjë janë kryesisht shqiptarë.
Burime pranë grupit hetimor sqaruan se po zbatohen gjithashtu vendimet e sekuestrimit te pasurive te dyshuara se rrjedhin nga te ardhurat e aktivitetit kriminal apo te ardhura te tjera te paligjshme, në vlerë disa milion euro.
Gjatë hetimeve të kryera në Shqipëri të operacionit SHEFI dhe KULMI, të nisura nga DIA e Bari-t në vitin 2018 e në vitin 2020, janë rindërtuar, edhe me ndihmën e deklaratave të katër bashkëpuntorëve të drejtësisë, përveç fenomeneve të korrupsionit, shpërdorimit të detyrës dhe të pastrimit të parave, edhe i gjithë “zinxhiri i prodhimit” të lëndës narkotike që nga kultivimi, prodhimi, mbledhja, magazinimi dhe me pas trafikimi ne drejtim te brigjeve pulieze në bordin e gomoneve oqeanike të fuqishme.
Të dhëna më të hollësishme mbi operacionin, do të jepen gjatë konferencës me shtypin që do të zhvillohet sot në Tiranë në orën 10:30, ku do të marrin pjesë dr. Cafiero DE RAHO – Prokuror kombëtar i Anti-mafias e Anti-terrorizmit, Arben Kraja – Drejtues i Prokurorisë së Posaçme Kundër Korrupsionin e Krimit të Organizuar, dr. Filippo SPIEZIA – Zëvëndës President e pjestar për palën e Italisë në Eurojust, dr. Roberto ROSSI – Kryeprokuror i Republikës në Bari dhe zoti Maurizio VALLONE – Drejtori i Pergjithshem i DIA-s Ardi Veliu Drejtori i Përgjithshëm i Policisë Shqiptare.
