Këngëtarja e famshme Camila Cabello përmes një traileri ka zbuluar se do të jetë pjesë e një filmi ku do të ketë rolin kryesor. Ajo do të portretizojë Hirushen në përrallën e njohur për të gjithë.
Cabello përmes një postimi në Twitter, ndau me fansat: “Kjo ishte një nga përvojat më magjike të jetës sime. Mezi pres që ju ta shihni”.
Në filmin e ri do të ketë dhe disa ndryshime. Hirushja është një rrobaqepëse, ajo nuk mund të shkojë në ballon e princit derisa “zana e saj” (Billy Porter) e lejon atë të hyjë brenda.
Në një intervistë për Variety në vitin 2019, këngëtarja u shpreh se pjesëmarrja e saj në këtë film ishte një ëndërr për të. Përveç si aktore, Camila Cabello do të jetë edhe këngëtare.
“Hirushja” ishte vendosur më parë të dilte në kinema, por pas vonesave të shumta për shkak të pandemisë së koronavirusit, studioja e Hollivudit Sony Pictures vendosi ta licenconte filmin në Amazon.
Filmi “Hirushja” do të shfaqet në Amazon Prime më 3 shtator.
