Tre persona, mes tyre një efektiv policie, janë arrestuar mëngjesin e sotëm pranë liqenit artificial në kryeqytetet. Në makinën e drejtuar nga efektivi i komisariatit numër 2, është gjetur një sasi kokaine.
Në këto kushte, janë vënë në pranga personat që ndodheshin në automjet.
Të arrestuarit
Në pranga u vunë:
- Elefterios Sullaj, 29 vjeç, me detyrë oficer i patrullës së përgjithshme në Komisariatin e Policisë Nr.2, Tiranë. Ai akuzohet për veprat penale të “Prodhimi dhe shitja e lëndëve narkotike”, Shpërdorimit të detyrës”, “Korrupsion pasiv i personave që ushtrojnë funksione publike” dhe “Ushtrimit të ndikimit të paligjshëm ndaj personave që ushtrojnë funksione publike”.
- Mikel Zhegu, 23 vjeç. Ai akuzohetpër kryerjen e veprës penale të “Prodhimit dhe shitjes së narkotikëve”.
- Eris Tafa, i dyshuar për kryerjen e veprës penale të “Largimi i të burgosurit nga vendi i qëndrimit”. Ky i fundit është person me masë sigurimi personal “Arrest në Shtëpi”, sipas një vendimi të dhënë më 13 Dhjetor 2020, nga Gjykata e Shkallës së Parë Tiranë.
Hetimet dhe Arrestimi
Aksioni për ndalimin e tyre u krye nga Drejtoria e Hetimit e SHÇBA-së, në bashkëpunim me Sektorin Kundër Narkotikëve të DVP Tiranë. Hetimet për rastin, ndërkohë, janë ndjekur nga SPAK. Prokuroria e Posaçme Kundër Korrupsionit dhe Krimit të Organizuar njofton se ka regjistruar procedimin penal që në vitin 2020.
“Pas një periudhe disa mujore hetimi me metoda proaktive, në bashkëpunim me policinë gjyqësore pranë Drejtorisë së Hetimit, Shërbimit të Çështjeve të Brendshme dhe Ankesave, u bë e mundur, më datë 01.07.2021 në orët e para të mëngjesit, kapja në flagrancë në kryqëzimin e Rrugës së ‘Kosovarëve’ e automjetit me targë AA211PX, në drejtimin e së cilës ishte punonjësi i policisë Eleflerios Sullaj, efektiv i Komisariat të Policisë Nr 2 Tirane, dhe pasagjer shtetasit Mikel Zhegu dhe Eris Tafa. Gjatë kontrollit në automjet, u gjet dhe u sekuestrua një qese plastike transparente në brendësi të së cilës kishte material pluhuri me ngjyrë të bardhë, e dyshuar lëndë narkotike kokainë”, sqaron SPAK.
Për këtë procedim penal, vazhdojnë hetimet për Zbardhjen e mëtejshme të fakteve, thanë më tej burime zyrtare nga prokuroria e Posaçme.
