Nga Velipoja, në Durrës, Vlorë dhe më në jug të vendit, policia e rendit e ndihmuar nga ajo bashkiake, kanë nisur punën për heqjen e çadrave dhe shezlloneve të vendosura nga bizneset, me pretendimin se nuk kanë marrë leje në e-albania.
Shumë prej pushuesve, që i kanë nisur tashmë zyrtarisht pushimet e tyre, janë detyruar që të prishin rehatinë, dhe të mbledhin plaçkat për shkak të aksionit policor, që është bërë me urdhër direkt të kryeministrit Edi Rama.
Ky i fundit tha dje se duhet të marrë fund paligjshmëria, por mbetet e paqartë se kush do ti menaxhojë hapësirat e liruara, sa kohë që shumë biznesmenë po ankohen për korrupsionin që fshihet nga pas.
Disa pushues nga Kosova, që po pushonin në Durrës, thanë se i kanë paguar shezlonet dhe çadrat për 10 ditë, dhe kërkuan kthimin e parave mbrapsht, ndërsa e gjithë situata duket të jetë një njollë turpi në të gjithë vendin.
Në Velipojë nga 100 biznese që operojnë në zonë, ku ndodhi dhe vrasje e katërfishtë për shkak të këtyre konfliteve, vetëm një prej bizneseve ka marrë leje për vendosjen e çadrave, ndërkohë që të tjerët, nuk kanë mundësi që të akomodojnë pushuesit.
Ligji e parashikon qartë se në rast se një biznes ka më shumë se 20 dhoma akomoduese, duhet të ketë dhe një hapësirë që i dedikohet vendosjes së çadrave, ndërkohë që shumë prej biznesmenëve thonë se ata kanë investuar prej vitesh në mirëmbajtjen e zonës së plazhit.
Njoftimi i policisë për aksionin në Durrës:
Në kuadër të operacionit “Bregdeti ynë”, nis faza e dytë e operacionit për lirimin e hapsirave bregdetare të zaptuara në mënyrë të kundraligjshme me shezlongë e çadra.
Në zbatim të planit operacional të hartuar nga Drejtoria e Përgjithshme e Policisë së Shtetit “Për kontrollin e vijës bregdetare në drejtim të zaptimit të vijës bregdetare nga subjekte apo persona të cilët nuk janë konfirmuar nga e-Albania”, Task-Forca e veçantë në përbërje të së cilës ka 2 grupe FNSH, 2 grupe të Forcës së Posaçme “Shqiponja”, shërbime të Komisariatit të Policisë Kavajë, Policia Bashkiake dhe struktura të mjedisit të Policisë Bashkiake, prej mëngjesit të sotëm ka nisur kontrollet dhe verifikimet në territorin e plazhit në Golem.
Kontrolli ka filluar nga Përroi Agait në drejtim të Karpenit, dhe kontrollet do vazhdojnë në të gjithë vijën bregdetare. Si rezultat i kontrolleve janë evidentuar 11 parcela pa leje ku janë hequr rreth 550 shezlongë dhe rreth 280 çadra. Operacioni vijon pa probleme.