Një stimulues kardiak, pa bateri, që fjalë për fjalë mund të zhduket në trup pas një kohe të programuar, është dizajnuar dhe testuar me sukses te kafshët, sipas një hulumtimi amerikan të botuar në revistën “Nature Biotechnology”.
Pajisja, e cila është testuar në një seri kafshësh, mund të ndihmojë pacientët që shërohen nga operacioni në zemër dhe të cilëve u duhet përkrahja e përkohshme për të ruajtur rrahjet e zemrës së tyre.
Stimuluesit aktualë të përkohshëm tipikisht paraqesin tuba dhe lidhje të futura përmes lëkurës, me pajisje të jashtme që paraqesin rrezik infeksioni dhe kufizojnë lëvizjen e pacientit, sipas rishikimit.
Përveç kësaj, kur stimulimi nuk kërkohet më, heqja e pajisjes së implantuar mbart rrezikun e dëmtimit të indeve kardiake.
Në një përpjekje për të zgjidhur këto probleme, studiuesit zhvilluan këtë stimulues kardiak plotësisht të implantueshëm dhe të absorbueshëm për kontrollin e rrahjeve dhe ritmit të zemrës në disa pacientë.
Pajisja mundësohet nga transferimi i energjisë pa tel, pa bateri. Materialet prej të cilave është i përbërë absorbohen në trup nga proceset natyrore biologjike pas një periudhe të programueshme kohore.
Fleksibiliteti i këtyre materialeve gjithashtu lejon që pajisja të përputhet me sipërfaqen e lakuar të zemrës dhe të përshtatet me lëvizjet e saj.
