Nga BoldNews.al
Dorian Tola, kreu i Drejtorisë së Sigurimit të Informacionit të klasifikuar, i ka bërë vetes një “dhuratë” të shtrenjtë! BoldNews ka siguruar dokumentet e një tenderi që ka kryer kjo drejtori, e cila ka si objekt sigurimin e informacionit. Por, ky sigurim, do të bëhet me një celular të shtrenjtë?! Dhe, për më tepër nga kreu i kësaj drejtorie? Megjithatë, duke hulumtuar dokumentet e këtij tenderi, duket se celulari do të jetë për drejtorin, i cili ka menduar që t’ia bëjë këtë dhuratë vetes, duke qenë se kanë dalë modelet e fundit në treg.
Në dokumente thuhet se objekti i tenderit është blerje telefoni celular nga Drejtoria e Sigurimit të Informacionit të Klasifikuar. Fitues është kompania “IL – AD” Company, e cila ka ofruar 116,720 lekë, ose bashkë me TVSH rreth 1 mijë euro. Nisur nga vlera, celulari duhet të jetë i modeleve të fundit, nga këta inteligjentët që do të përdorë Tola. Madje, ka edhe specifikimet që të jetë bashkëkohor dhe të lejojë përditësimet aktuale dhe të ardhshme.
Më tej, sqarohet se celulari të mundësojë siguri ndaj ndërhyrjeve të paautorizuara të formave të ndryshme, të ketë qëndrueshmëri gjatë përdorimit dhe komunikim me zë dhe të dhëna. Të ketë kapacitet për të përdorur shpejtësinë e internetit 4G/LTE/5G si dhe me memorie 64 G. Ekrani të jetë 6 inç, të suportoj iOS 14.1 ose të ngjashëm. Tola e kërkon telefonin me valë dhe standard me fushë, të përfshijë kover dhe xham mbrojtës. Ndërkohë, produkti të jetë i ambalazhuar në konfeksion të ri, i pahapura e i padëmtuara me elementët përkatës të sigurisë/ vulë origjinaliteti të prodhuesit. Emri i prodhuesit duhet të jetë i stampuar në kuti.
