Prokuroria e Tiranës i ka kërkuar Gjykatës ndryshimin e masës nga “Arrest në shtëpi” në “Arrest me burg” për Jehon Breçanin, të riun që përplasi 23-vjeçaren më 10 qershor në rrugën “Xhanfize Keko” në Tiranë.
Sipas kërkesës së Prokurorisë së Tiranës, referuar të gjitha fakteve të mbledhura pas hetimit të kësaj ngjarjeje, Gjykata duhet të jepte masën e sigurisë ‘Arrest me burg’ për të riun, referuar këtu edhe rrezikshmërisë së lartë shoqërore të veprës penale të kryer nga ai.
Kujtojmë se 19-vjeçari, djali i Erzen Breçanit, ish-zëvendës drejtorit të Policisë së Shtetit po drejtonte makinën luksoze tip “Benz S Class”, ndërsa ka hipur në trotuar dhe ka përplasur këmbësoren Xhenisa Gega, e cila si pasojë e plagëve të marra mbeti edhe invalide pasi humbi njërën këmbë.
Pas aksidentit 19-vjeçari u shoqërua në ambientet e Komisariatit nr.4, ku pas veprimeve hetimore u arrestua në flagrancë për shkelje të rregullave të qarkullimit rrugor.
Ai iu nënshtua edhe testit të alkoolit, por nuk rezultoi të ishte nën efektin e pijeve alkoolike. Dyshohet se kur është aksidentuar ka qenë me shpejtësi të lartë.
