Përplasja e Velipojës, ku mbetën të vrarë katër persona dhe u plagosën dy të tjerë, tashmë i ka kaluar kufijtë e vendit, dhe ka gjetur jehonë në mediat e huaja. Është prestigjozja gjermane “Bild” ajo që shkruan sot se përplasja në Velipojë ka nisur për shkak të një mosmarrëveshje për shezllonet, dhe u përshkallëzua në përdorimin e armëve.
Shkrimi i plotë i Bild:
Katër të vdekur dhe dy të plagosur, ky është rezultati i trishtuar i një mosmarrëveshje që u përshkallëzua në Shqipëri rreth shezlloneve.
Sipas raporteve të medias, anëtarët e dy klaneve familjare janë përplasur me njëri-tjetrin. Ata operojnë në dy hotele që janë vetëm 50 metra larg njëri-tjetrit. Kjo ka bërë që problemet mes tyre të kenë qenë të shpeshta.
Përplasja e përgjakur ndodhi në plazhin e Velipojës në veri të vendit. Sherri kishte filluar për vendosjen e çadrave dhe shezlloneve. Pas një diskutimi të shkurtër, ata që ishin të përfshirë nxorën armët dhe qëlluan njëri-tjetrin.
Për shkak të të shtënave, në vendngjarje mbërritën forca të shumta policie, ndërkohë që disa prej autorëve janë larguar.
Oficerët derimë tani kanë arrestuar dy të dyshuar për armëmbajtje pa leje dhe të shtënat. Të arrestuarit janë një burrë 54 vjeç dhe nipi i tij 17 vjeç. Dy armë u sekuestruan gjithashtu. Policia ende po kërkon tre persona si të përfshirë.
Vizitorët në hotelet aty pranë kanë përfunduar pushimet para kohe për shkak të të shtënave me armë. Një burrë tha: “Kemi ardhur për argëtim, por kemi dëgjuar të shtëna armësh gjithë natën. Ky është tmerr, nuk mund të qëndroj këtu”. Ai dhe familja e tij tani po kthehen në Kosovë.
