Erbim Fagu do të jetë trajneri i ri i Tiranës për moshat U-21. Ish “timonieri” i 19-vjeçarëve te Akademia e Redi Jupit, tashmë është graduar në klubin më të titulluar në Shqipëri.
Lajmi bëhet me dije në kanalin zyrtar të Tiranës, ku theksohet se veç se trajner i parë te 21-vjeçarët, ai do të jetë dhe ndihmësi i Orges Shehit. Në njoftimin për mediet thuhej:
“Klubi i Futbollit Tirana njofton zyrtarizimin e trajnerit te moshave U-21, Erbim Fagu. Tekniku do të marrë drejtimin e ekipit U-21 por gjithashtu do të jetë edhe në funksion te ekipit të parë në rolin e ZV. trajnerit. Pas një eksperience si lojtar i spikatur, Fagu kthehet në shtëpinë bardheblu tashmë si pjesë e rëndësishme e pankinës së Tiranës. Ai do të jetë krahu i djathtë i trajnerit Shehi duke filluar nga dita e sotme në proçesin e seleksionimit të të rinjve”.
Kujtojmë që Fagu ka qenë një nga ish-futbollistët të spikatur të kampionatit shqiptar. Por, një dëmtim i rëndë i kushtëzoi karrierën duke u detyruar të “varë këpucët në gozhdë” prej moshës 26-vjeçare.
Pas një eksperience pozitive me moshat e Football Republic, tashmë ai do të jetë krahu i djathtë i Shehit për ta ndihmuar me elementë cilësorë nga Akademia, por dhe si ndihmës i tij për skuadrën e parë.
