Të shtëna me armë zjarri janë shënuar mbrëmjen e djeshme në Drimadhes, konfirmoi këtë të Hënë policia.
Nga të shtënat, që erdhën në vazhdën e një konflikti, nuk raportohet për të plagosur. Në kërkim si autor i ngjarjes është shpallur një i ri.
“Nga specialistët për Hetimin e Krimeve në Komisariatin e Policisë Himarë u bë shpallja në kërkim e shtetasit H.F., 28 vjeç, pasi dyshohet se mbrëmjen e djeshme, në Drimadhes, gjatë një konflikti të çastit, ka qëlluar në ajër me armë (sportive) pistoletë dhe është konfliktuar fizikisht me shtetasit D.D. dhe O.T.”, thuhet në njoftimin paraprak të bluve për ngjarjen, që vjen një ditë pas krimit në Velipojë, ku pas një konflikti mes dy biznesmenëve për shazlonge, katër veta u vranë dhe dy të tjerë u plagosën.
Ngjarje të tilla kriminale vijojnë të jetë prezentë në vend vit pas viti gjatë sezonit turistik, duke rritur pasigurinë për jetën për qytetarët.
“Rreth orës 01:00 të kësaj të Hëne, po në Drimadhes, ka rënë zjarr dhe janë djegur rreth 60 shezlongë në pronësi të shtetasit B.D.”, njoftoi po ashtu policia. Dyshohet se ngjarja është e qëllimshme.
Kujtojmë se edhe disa javë më parë, një sulm me armë u shënua ndaj një lokali, ndërsa u plagos edhe pronari i biznesit.
