Katër persona humbën jetën dhe dy të tjerë mbetën të plagosur si pasojë e një konflikti me armë zjarri mes familjeve Ferracaku dhe Gocaj në Velipojë.
Të dy familjet kishin hotele në plazhin e Velipojës dhe shkaku i nisjes së konfliktit ishte hapësira mbi vendosjen e shezlongjeve.
Pjesëtarë të familjes Gocaj pohojnë se pikërisht vonesat e institucioneve shtetërore për të ndarë zonën e bregdetit, ku hotelet vendosin shezlongjet, çuan në konfliktin mes dy familjeve, duke shkaktuar 4 viktima.
Mes familjes Ferracaku dhe Gocaj kishte nisur një konflikt prej mesditës së të shtunës, i cili në orët e mëvonshme degradoi deri në përdorimin e armëve nga të dyja palët.
Mësohet se Kujtim Ferracaku, së bashku me të vëllanë e tij, Hasan Ferracaku, pronar të hoteli ‘Fantazia’, kishte shkuar pranë hotelit Gocaj pas sherrit te mesdites dhe duket se mes palëve tonet e konfliktit kanë qenë të nxehta, dhe më pas situata ka degjeneruar në përdorimin e armëve.
Viktima të këtij konflikti kanë mbetur shtetasit Kujtim Ferracaku, 59 vjeç, Xhovani Gocaj, 25 vjeç, Edmond Gocaj, 38 vjeç dhe Myzerim Zeneli, 20 vjeç. Ky i fundit raportohet se ishte kamarier në hotelin Gocaj dhe dje ishte dita e parë e punës.
Në vendngjarje është gjetur vetëm një armë pistoletë, ndërsa të dhënat janë se është përdorur më shumë se një armë.
Pjetër Gocaj, babai i dy viktimave, Xhovani dhe Edmond, shprehet se ishin Ferracakët që kishin shkuar në hotelin e tij, dhe kishin qëlluar mbi djalin e madh. Ky i fundit mësohet se ishte kthyer nga Anglia për të investuar në fushën e turizmit.
Deri në mesditën e sotme nuk ka asnjë të arrestuar për këtë ngjarje.
Sa iu takon të plagosurve Hasan Ferracaku dhe Elmind Dyli, mësohet se janë në gjendje të rëndë për jetën, dhe janë dërguar për kurim në spitalin e Traumës në Tiranë.
