Kryeministri i Kanadasë, Justin Trudeau, tha të premten se i ka kërkuar Papa Françeskut që ta vizitojë vendin e tij dhe të kërkojë falje për rolin e Kishës Katolike në udhëheqjen e shkollave me konvikte për fëmijët indogjenë, pasi rreth 1.000 trupa u gjetën në dy varreza masive.
“Kam folur drejtpërdrejt me Shenjtërinë e Tij, Papa Françeskun, për ta shtyrë të pranojë se sa e rëndësishme është që jo vetëm që ai të bëjë një kërkimfalje, por që të kërkojë falje nga kanadezët indogjenë në tokën kanadeze”, deklaroi Trudeau para gazetarëve në Otavë.
“Unë e di se udhëheqësia e Kishës Katolike është duke shikuar dhe është e angazhuar në mënyrë shumë aktive në atë se çfarë hapa të ardhshëm mund të bëhen”, shtoi ai.
Një organizatë për popujt indogjenë në Kanada tha se rreth 750 varre pa shenja janë gjetur në objektin që dikur ishte shkollë me konvikt në Saskatcheëan, vetëm disa javë pasi 215 varre pa shenja u zbuluan në një ish-shkollë tjetër në rajonin British Columbia, shkruan Reuters.
Sistemi i shkollave me konvikte, që ishte aktiv mes viteve 1831 e 1996, i kishte larguar rreth 150.000 fëmijë indogjenë nga familjet e tyre dhe i kishte dërguar në shkollat kishtare me konvikte, që operonin në emër të qeverisë federale.
Sipas raportit të një komisioni federal, sistemi i shkollave me konvikte ka kryer gjenocid kulturor ndaj popullit indogjen të Kanadasë.
Më herët këtë muaj, Papa Françesku nuk kërkoi falje drejtpërdrejt, por tha se ndien dhimbje për gjetjen e mbetjeve të 215 fëmijëve dhe bëri thirrje për respektim të të drejtave dhe kulturës së popujve indogjenë.
