Florian Marku do të përballet me Maxim Prodan më 7 gusht. Bëhet fjalë për një boksier rumun, të lindur në Ukrainë. 28-vjeçari ka 20 ndeshje në karrierë dhe nuk njeh humbje. Prodan ka triumfuar 19 herë, 15 me KO dhe një ndeshje e ka mbyllur në barazim.
Sikurse kuptohet, kundërshtari i Markut është goxha serioz. Edhe boksieri shqiptar nuk ka asnjë humbje deri më tani. Ai ka triumfuar 8 herë dhe një herë ka dalë barazim, në një ndeshje shumë të diskutuar kundër Jamie Stewart.
Tashmë ngacmimet mes Markut dhe Prodan kanë nisur, me lushnjarin që i kundërpërgjigjet rivalit pas një deklarate të bërë së fundmi.
“Sot pashë një video të kundërshtarit tim që thotë që unë bëra gabim që e pranova këtë ndeshje me të, sepse është shumë herët për mua dhe do humbas. Hehehe, unë do u tregoj të gjithëve që nuk ishte fare herët, por ishte e lehtë”.
