Nga Boldnews.al
Një aksident tragjik ndodhi mëngjesin e sotëm në Vlorë, ku 4 anëtarë të një familjeje, mes të cilëve dy fëmijë të mitur humbën jetën. Në aksident u perfshinë dy automjete, ku makina që goditi tjetrën, dhe ku udhëtonte familja që u shua, ishte me shpejtësi 150 km në orë.
Një aksident që mund të shmangej, nëse do të respektoheshin rregullat e qarkullimit, nëse ajo propaganda dhe show që njoftohet çdo ditë me komunikatat zyrtare të policisë do të zbatohej në terren. Aksidente ndodhin kudo, jetë të humbura si pasojë e tyre regjistrohen çdo ditë, por ajo që ndodh në rrugët e Shqipërisë është krejt tjetër. Publikisht janë denoncuar raste kur automjete luksoze, te drejtuara nga adoleshentë organizojnë gara shpejtësie.
E bëjnë në Tiranë, e bëjnë në superstradat apo autostradat e vendit, e bëjnë në ccdo aks rrugor ku mendojnë se ata janë zotër të rrugës. Dhe në realitet tragjeditë, që mund të ishin të panumërta shmangen se ndoshta njerëzit në këtë vend mbrohen nga Zoti, dhe jo nga ata që propagandojnë. Dilni çdo natë në akse të ndryshme, në segmentin nga TeG, apo në Bulevardin e Ri, në segmentin nga kopshti zoologjik dhe përgjatë unazës së madhe, janë me dhjetra automjete, nga më luksozet që nuk ecin, por fluturojnë. Madje si për karshillëk videot i postojnë në rrjetet sociale. Janë të rinj, adoleshentë të papjekur, ose shumë të sigurtë, djemtë “e fortë” të zyrtarëve apo politikanëve, oligarkëve apo të emrave të njohur, që sillen si vrasës të heshtur pa pagesë. Ata stë vrasin për të grabitur, as pse më pe, as se po i prish pazaret, ata të vrasin për sport, te vrasin se janë bijtë e paprekshëm të baballarëve apo prindërve që për shkak të pozicioneve ose pasurisë mund të blejnë çdo gjë.
Këta janë vrasësit e heshtur, ata qe nuk të njoftojnë se po të vrasin, që nuk të lenë kohë as të mbrohesh, por vijnë me shpejtësi plumb dhe ose të nxjerrin nga rruga ose të bëjnë përshesh. Këta nuk ndalohen me show dhe propagandë, as tremben kur policia njofton se ka marrë radarë apo dronë, që përdor dragera apo ka nxjerrë në rrugë 1 apo 2 efektivë. Këta nuk i kap as droni, as drageri, as radari, sepse edhe po i kapi, prindërit e tyre, dinë si të veprojnë.
Këto garat e Formula1 në Tiranë apo akse të tjera rrugore nuk bëhen fshehurazi, jane denoncuar dhe ridenoncuar mediatikisht, përmes rrjeteve sociale apo qoftë edhe zyrtarisht nga qytetarët në numrat e vendosur, por askush nuk i ndal. Ndaj pyetja që lind është ku janë dragerat, dronët, radarët? Ku është drejtori i sigurisë rrugore në Policine e Shtetit, ku është Mithat Tola dhe çdo drejtues tjetër vartës i tij? Nuk diskutohet që janë në zyra, por nuk po përmbushin detyrën, atë të sigurisë rrugore, që vijon të shuajë jetë njerëzish.
Nuk është çështje ligji as ashpërsimi të Kodit Rrugor, as çështje ndërgjegjësimi. Mungon plani i masave, mungon vullneti, dhe mbi të gjitha çunakët që sillen si vrasës të heshtur, me shume llastohen nga ata që për detyrë kanë të parandalojnë tragjeditë.
