Justin Timberlake ka dalë publikisht në mbështetje të Britney Spears.
“Pas asaj që pamë sot, të gjithë duhet të mbështesim Britney në këtë kohë,” shkroi Timberlake në Twitter dje në mbrëmje, pas dëshmisë bombë të Spears në seancën e saj gjyqësore. “Pavarësisht nga e kaluara jonë, e mirë dhe e keqe, dhe pa marrë parasysh se sa kohë ka kaluar… ajo që po ndodh me të thjesht nuk është e drejtë. Asnjë grua nuk duhet të kufizohet kurrë nga marrja e vendimeve për trupin e saj,” –tha Timberlake duke iu referuar faktit që kujdestaria nuk e lejon të ketë më fëmijë.
Në postimet e mëvonshme, Timberlake shtoi: “Askush nuk duhet të mbahet kurrë kundër vullnetit të tyre … ose kurrë nuk duhet të kërkojë leje për të pasur diçka për të cilën ka punuar kaq shumë. Jessica (gruaja e Timberlake) dhe unë i dërgojmë Britney-t dashurinë dhe mbështetjen tonë absolute për këtë kohë. Shpresojmë që gjykatat dhe familja e saj të marrin një vendim të drejtë dhe ta lënë të jetojë, sido që ajo dëshiron të jetojë”.
Spears ka qenë nën kujdestarinë e të atit, e vendosur gjatë problemeve të saj me shëndetin mendor që u bënë publike pas divorcit të saj nga Kevin Federline, për 13 vitet e fundit.
Gjatë fjalimit të saj 23-minutësh me gjyqtaren Brenda Penny, ajo iu kundërvu familjes së saj, duke akuzuar se veprimet e të atit dhe ekipit të saj janë për t’u dënuar me burg.
Spears tha se babai i saj, Jamie Spears, donte me çdo kusht kontrollin që ka mbi të dhe mbi çdo gjë që lidhet me jetën e saj. Këngëtarja tha se ajo ka gënjyer për mirëqenien e saj për vite me radhë dhe dëshiron që gjërat të ndryshojnë. Gjithashtu ajo nuk dëshiron të vlerësohet për të përcaktuar nëse e ka rifituar ose jo kapacitetin e saj mendor.
“Unë vetëm dua të më kthehet jeta ime,” tha ajo. “Gjithë sa dua është të zotëroj paratë e mia dhe që i dashuri im të jetë në gjendje të më lëvizë lirshëm me makinën e tij. Dua të krijoj familjen time.”
“Nuk është në rregull të më detyrosh të bëj gjithçka që nuk dua”, tha Spears. “Duhet të marrë fund, kjo gjë është abuzim ndaj meje. Babai im dhe kushdo që është i përfshirë në këtë situatë, duhet të jenë në burg.”
Ajo gjithashtu tha se dëshiron të jetë në gjendje të martohet dhe të ketë një fëmijë. Britney pretendoi se nuk i ishte lejuar të merrte ato vendime nga vetë ajo.
“Ndihem e mbytur, e bullizuar, ndihem e lënë jashtë dhe vetëm. Jam lodhur duke u ndjerë vetëm”,-tha Spears. “Unë meritoj të kem të njëjtat të drejta si çdokush.”
