Katër persona, pjesëtarë të një familjeje nga Patosi i Fierit e që jetonin në Greqi prej vitesh, kanë humbur jetën në një aksident automobilistik në afërsi të Vlorës mëngjesin e kësaj të Premteje.
Eduart Gushi, 44 vjeç, i vendosur në Greqi prej rreth 20 vitesh, bashkëshortja e tij Silvana Gushi, 33 vjeçe dhe dy vajzat: Anastasia Gushi, 14 vjeçe e Eva Gushi, 9 vjeçe, mbetën të vdekur.
Aksidenti ndodhi rreth orës 08:23 në autostradën Fier-Vlorë, në vendin e quajtur “Kripa”.
Viktimat udhëtonin në një automjet tip “Toyota”, që sipas policisë është përplasur me një automjet tjetër tip “Audi”.
Për pasojë, humbën jetën të gjithë personat që udhëtonin në mjetin “Toyota” dhe u plagosën tre të tjerët të cilët lëviznin me “Audi-n”. Të plagosurit – Igli Madani 21 vjeç nga Tirana, Fabio Lamaj nga Fieri, 21 vjeç dhe Glori Selimi u transportuan në spitalin Rajonal të Vlorës dhe sipas policisë, ndodhen jashtë rrezikut për jetën.
Dinamika e aksidentit mbetet për tu përcaktuar, megjithatë nga raportimet e para mediatike, flitet se “Audi” që dyshohet se lëvizte me shpejtësi tej normave të lejuara, ka goditur nga pas mjetin tip “Toyota”.
Kujtojmë se shpejtësia e lejuar në këtë aks është 110 km/H.
Dy makinat kanë dalë nga rruga duke pësuar dëme të konsiderueshme. Nga pamjet që vijnë nga vendngjarja, makina ku ndodheshin viktimat duket e shkatërruar pas aksidentit.
Më pak dëmtime, ka pësuar mjeti tjetër.
Viktimat mendohet se ishin nisur drejt banesës së prindërve të Silvana Gushit dhe më pas do të nisnin pushimet verore. Ndërsa prindërit e Eduart Gushit po ashtu jetojnë në Greqi.
