Perspektiva e pushimeve në Evropë për britanikët mund të përballet me një pengesë tjetër, pasi kancelarja gjermane Angela Merkel sugjeroi që të gjitha vendet e BE duhet t`i vendosin vizitorët nga Mbretëria e Bashkuara në karantinë 14 ditore, për të ngadalësuar përhapjen e variantit Delta.
Ajo i tha parlamentit të Gjermanisë: “Në vendin tonë, nëse vini nga Britania e Madhe, duhet të futeni në karantinë – dhe kjo nuk ndodh në çdo vend evropian, dhe kjo është ajo që unë do të doja të shihja”.
Aktualisht, atyre që udhëtojnë nga Britania e Madhe për në Greqi, Spanjë dhe Portugali nuk u kërkohet të karantinohen. Ata që shkojnë në Itali duhet të izolohen për pesë ditë ndërsa vizitorët plotësisht të vaksinuar të Britanisë në Francë mund të hyjnë pa u karantinuar.
I pyetur në lidhje me vërejtjet e zonjës Merkel mbi variantin Delta që do të thotë më shumë kufizime për udhëtarët britanikë që shkojnë jashtë vendit, kryeministri Johnson tha:
“Më shumë se 60% e popullsisë sonë tani ka marrë të dyja dozat, ndërsa 83% kanë kanë marrë një dozë. Gjëja thelbësore është, dilni dhe merrni dozën tuaj të dytë,” tha ai.
Varianti indian i koronavirusit, i cili besohet që është më i transmetueshëm se te tjerët, ka alarmuar gjithë botën, por OBSH pretendon se në përgjithësi vaksinat edhe ndaj këtij varianti mbeten efektive.
