Trafik droge drejt Anglisë, shqiptarët e fshihnin kokainën mes tulipanëve

Policia holandeze ka goditur një grup që trafikonte kokainë drejt Anglisë, duke përdorur dërgesat me lule.

Sipas medieve holandeze, në pranga kanë rënë dy shqiptarë dhe një holandez. Ky i fundit për momentin është liruar, por mbetet nën mbikëqyrje. Nuk përjashtohet mundësia që të ketë arrestime të tjera.

Ata përdornin një kompani të njohur lulesh për të maskuar dërgimin e sasive të kokainës drejt Anglisë. Kompania ishte e vendosur pranë panairit më të madh të luleve në botë.

Dy shoferë anglezë ngritën të parët alarmin kur vunë re se lulet në kamionin e tyre nuk ishin paketuar siç duhet. Policia nuk jep shumë detaje, por thotë se lulet vendoseshin në kamion në një mënyrë të palogjikshme.

Shqiptarët përdornin në këtë mënyrë shoferë të pafajshëm. Një metodë cinike, pasi nëse zbuloheshin, do të përfundonin në burg për vite të tëra.

Pasi shoferi i parë bëri raportimin në polici, mes luleve u zbuluan plot 20 kg kokainë.

LEXO EDHE  Ndërprerje e energjisë elektrike sot në Tiranë, zonat dhe oraret

Detektivët nisën një hetim të madh, duke zbuluar se në këtë mënyrë ishin bërë dërgesa të vazhdueshme. Pak muaj më vonë, një shofer i dytë nga një tjetër kompani transporti, bëri të njëjtin denoncim. Sërish mes luleve u zbuluan 20 kg kokainë.

Detektivët deshifruan mesazhet që dërgonin trafikantët në rrjetin e koduar Sky ECC. Aty u zbuluan mbi 50 mijë mesazhe. Shqiptarët përdornin pseudonime fikse, të një lojtari futbolli, të një krimineli droge dhe të një logoje. Termi ‘tullë’ në shqip përdorej për blloqet e kokainës.

Përmes mesazheve, policia ra në gjurmët e trafikantëve, duke zbuluar vendin ku takoheshin në panairin e luleve. Megjithatë aty binin në sy sepse ishin amatorë dhe përdornin kryesisht para të thata.

Ata pritet të dalin përpara gjykatës, ndërkohë që tregu i luleve është përdorur edhe në të shkuarën për të maskuar trafikun e kokainës.