Ambasadori i OSBE, Vincenzo Del Monaco, në një deklaratë për medien nga Korça u shpreh se ODIHR nuk bën certifikim të procesit të zgjedhjeve, por vetëm vëzhgim të procesit.
Ambasadori tha se duhet pritur raporti përfundimtar për të pasur rezultate sa më racionale.
“ODIHR nuk bën certifikim të procesit, bën vëzhgim të procesit, ne duhet të presim të dalë raporti përfundimtar sepse në atë mënyrë do kemi përfundime më racionale.
Në thelb raporti tregon disa përmirësime.
Ne si prezenca e OSBE-së në Shqipëri kemi pasur bashkëpunim shumë të mirë përpara zgjedhjeve edhe me partitë politike edhe me KQZ dhe mendoj që kjo është diçka inkurajuese.
Ne lançuam edhe një fushatë ndërgjegjësuese që rinia të merrte pjesë në zgjedhje dhe tema e rinisë është një nga temat që diskutova me kryetarin e bashkisë”, tha kreu i Prezencës së OSBE në Tiranë.
Reagimi i Del Monaco vjen pak ditë pasi Kryeministri Edi Rama në një media franceze tha se zgjedhjet e 25 prillit u certifikuan nga OSBE/ODIHR. Në fakt në raportin paraprak, vëzhguesit ndërkombëtarë kanë evidentuar një seri parregullsish, që nga përdorimi i administratës shtetërore në favor të PS deri te blerja e votave.
