Nga Edlira Gjoni
Qenka i bukur teatri në Vlorën tonë heroike:
– Komiteti i ekspertëve ka ndaluar hapjen e kinemave e teatrove, përfshirë “Petro Markon”.
Por sot, një letër e posaçme nga nëna parti lejon hapjen e tij, jo për teatër me aktorë, por me anëtarë të Keshillit Bashkiak, fort të nxehur që kryetari po lëndon popullin.
Nga ana tjetër, populli ka vapë e në gjumë. Por, në emër të tij, bëhet luftë e ashpër në teatër. Bash luftë brenda llojit.
Kryetari paska kërkuar diçka. Gjiknuri diçka tjetër. Rama po tjetër për tjetër. Siç thonë vetë, statuseve të tyre.
Ca thonë për leje ndërtimi. Ca për shfrytëzimi. Por unë besoj vetëm zërat që bërtasin më shumë para teatrit a zoom-it, edhe këmbëngulin që lufta është parimore. Në emrin tim, d.m.th. të popullit!
Sa shumë lodhen e luftojnë për ne. Po paskeshim qenë komb mosmirënjohës! Të gjithë ndoshta, po ne vlonjatët paskeshim qenë dramë fare. As i kuptojmë, as i vlerësojmë dot sa duhet shenjtët tanë politikë, që prej ditësh e javësh u këputën në mes në emrin tonë!
Gjynah! Popull edepsëz! Po shyqyr që kemi këshillin bashkiak në vijën e frontit, se do na kishte marrë lumi e deti fare!
