Kryetari i Bashkisë së Vlorës, Dritan Leli ka reaguar pas kërkesës së këshillit Bashkiak për mbledhje në mënyrë fizike, duke theksuar se një gjë e tillë është në kundërshtim me protokollet e masave anti-Covid.
Leli u është përgjigjur këshilltarëve duke thënë se më 24 qershor do të jetë mbledhja e radhës e administratës së Bashkisë së Vlorës aktivitet që do të zhvillohet online për shkak të masave anti Covid dhe i ka ftuar që të marrin pjesë.
“Jam para jush sipas kërkesë së Këshillit të bashkisë Vlorë për të zhvilluar një mbledhje jashtë radhe. Administrata dhe kryetari i bashkisë e vlerëson me përgjegjësi maksimale, morale dhe ligjore ushtrimin e funksioneve të përcaktuara të bashkisë Vlorë. E konsiderojmë keqkuptim pretendimin se nga administrata e bashkisë është penguar qëllimisht zhvillimi jashtë radhe i mbledhjes së Këshillit të Bashkisë. Përsa i përket pretendimit të disa këshilltarëve për tejkalim të kompetencave nga ana e kryetarit në përcaktimin e datës së mbledhjes ky pretendim është i pabazuar. Për korrektesë dhe transparencë nga ana e administratës së bashkisë është vënë në dispozicion të Këshillit një informacion në lidhje me problematikat sipas rendit të ditës. Në rastin konkret nuk ka qenë qëllimi i kryetarit të bashkisë të pengojë këshilltarët të hyjnë në ambientet e Teatrit “Petro Marko”. Ka një keqkuptim nga ana juaj kur i referoheni nenit 9 të ligjit nr 139/2015 datë 17.12.2015 për vetëqeverisje vendore pasi nuk bëhet fjalë për tjetërsim të pronës por thjesht për zhvillim të një takimi ku duhen respektuar procedurat ligjore. Do të sugjeronim që duke qenë se në datë 24.06.2021 është mbledhja e radhës e Këshillit të Bashkisë online në platformën Zoom sipas njoftimit me nr.9624 prot, datë 21.06.2021, në këtë mbledhje t’i bashkohet rendit të ditës edhe rendi i ditës së mbledhjes jashtë radhe të datës 22.06.2021″, tha ai në një komunikim online.